जापानी टोलीमाथि रिभर प्लेटको सानदार जित

काठमाडौं। अर्जेन्टिनाको रिभर प्लेटले बुधबार बिहान क्लब विश्वकप समूह ‘ई’ अन्तर्गत जापानको उरावा रेड डाइमन्ड्सलाई ३–१ ले पराजित गर्दै प्रतियोगितामा विजयी सुरुआत गरेको छ।

६९ हजार क्षमताको लुमेन फिल्ड स्टेडियममा करिब १२ हजार समर्थक उपस्थिति रहेको खेलमा अर्जेन्टिनी टोलीले उत्कृष्ट प्रदर्शन गर्‍यो। स्टेडियमको दुवै छेउबाट जापान र अर्जेन्टिनाबाट आएका समर्थकले जीवन्त वातावरण बनाएका थिए।

खेलपछि पहिलो गोलकर्ता फाकुन्डो कोलिडियोले भने,‘यात्रा निकै टाढाको थियो। तर, हाम्रा समर्थक यहाँसम्म आइपुगे। उनीहरूको समर्थन सानदार रह्यो।’

रिभरले सुरुआतमै दबाब बनायो। पूर्व सेभिल्ला डिफेन्डर मार्कोस आकुनाको क्रसमा कोलिडियोले हेडरमार्फत पहिलो गोल गरे। उरावाले त्यसपछि खेलमा फर्कने प्रयास गर्‍यो। युसुके मात्सुओको प्रहारलाई किपर फ्रान्को अरमानीले उत्कृष्ट बचाउ गरे। यद्यपि, त्यसबेला मात्सुओ अफसाइडमा थिए।

रियल मड्रिडमा अनुबन्ध हुने तयारीमा रहेका १७ वर्षीय फ्राङ्को मास्टान्तुओनोले नाचो फर्नान्डेजलाई उत्कृष्ट पास मिलाए। तर, उनको प्रहार थोरै बाहिरियो।

दोस्रो हाफको सुरुआतमै उरावाका मारिउस होइब्राटेनको गल्तीमा रिभरले दोस्रो गोल गर्‍यो। उनले गोलकिपरलाई फर्काएको कमजोर हेडरमा सेबास्टियन ड्रिउसीले मौका लिएर गोल गरे। तर, गोल गर्ने क्रममा उनी घाइते भए।

उरावाले एक पेनाल्टीबाट खेलमा फर्कने प्रयास गर्‍यो। आकुनाले ताकुरो कानेकोमाथि ट्याकल गर्दा पेनाल्टी दिइयो, जसलाई मात्सुओले गोलमा परिणत गरे। तर, खेलको अन्त्यतिर आकुनाकै कर्नरमा म्याक्सिमिलियानो मेजाले हेडरमार्फत गोल गर्दै रिभरलाई ३–१ को जित दिलाए।

‘दुर्भाग्यवश हामी आज हार्‍यौं, तर यस खेलबाट धेरै सिक्नेछौं,’ मात्सुओले भने।