एकै खेलमा ३ रातोसहित ७ कार्ड, २१ फउल

काठमाडौं। क्लब विश्वकपअन्तर्गत मंगलबार बिहान भएको समूह चरणको खेलमा पोर्चुगिज क्लब बेनफिकाले अर्जेन्टिनी जायन्ट बोका जुनियर्ससँग २–२ को रोमाञ्चक बराबरी खेलेको छ।

खेलमा ३ रातो कार्ड, ४ पहेँलो कार्ड र २१ फउलसहित निकै तनावपूर्ण वातावरण देखिएको थियो। ‘दुबै ठूला टोलीले प्रत्येक बलका लागि अन्तिमसम्म लडाइँ गरे,’  बोका मिडफिल्डर एलन बेलास्कोले भने।

५५ हजार ५७४ दर्शक क्षमताको हार्ड रक स्टेडियममा अधिकांश समर्थक बोका जुनियर्सका थिए, जसले खेललाई घरेलुजस्तो माहोल बनाए। बोका जुनियर्सले खेलको २१औं मिनेटमा मिगुएल मेरिएन्टेल र २७औं मिनेटमा रोड्रिगो बत्तालियाको गोलमार्फत २–० को अग्रता लिएको थियो।

तर, पहिलो हाफको इन्जुरी समयमा भिएआरको सहायताले कार्लोस पालासिओसको घुँडाले निकोलस ओटामेन्डीलाई हानेको ठहर गर्दै बेनफिकालाई पेनाल्टी दिइयो। एन्जेल डि मारियाले पेनाल्टी सफलतापूर्वक गोलमा परिणत गरे। निर्णयको विरोधमा बोका खेलाडी आन्डर हेरेरालाई रातो कार्ड देखाइएको थियो, जो पहिले नै घाइते भई मैदानबाहिर गइसकेका थिए।

बेनफिकाका आन्द्रेआ बेलोट्टीले ७२औं मिनेटमा विरोधी खेलाडीलाई चोट पुर्‍याएपछि रातो कार्ड पाए। खेलको अन्त्यतिर बोका डिफेन्डर निकोलस फिगालले फ्लोरेन्टिनोमाथि फाउल गरेपछि रातो कार्डसहित बाहिरिए।

खेलको ८४औं मिनेटमा निकोलस ओटामेन्डीले फ्रन्ट पोस्ट हेडरमार्फत बेनफिकाका लागि बराबरी गोल गर्दै टोलीलाई एक महत्त्वपूर्ण अंक दिलाए।

बोका जुनियर्स अब समूह ‘सी’ अन्तर्गत शुक्रबार मियामीमा बायर्न म्युनिखसँग खेल्दैछ, जुन खेल बोका लागि अझ चुनौतीपूर्ण हुने देखिन्छ। बेनफिका पनि शुक्रबार नै अष्ट्रेलियाली क्लब अकल्याण्ड सिटीसँग भिड्दैछ, जसले पहिलो खेलमा बायर्नसँग १०–० को लज्जास्पद हार व्यहोरेको थियो।