एमबाप्पेले बनाए फ्रान्सलाई तेस्रो
काठमाडौं। किलियन एमबाप्पेको कप्तानीमा फ्रान्सले आइतबार नेसन्स लिगको सान्त्वना जित हात पारेको छ।
रियल मड्रिडका स्टार एमबाप्पेले एक गोल गरे र अर्को गोलका लागि सहयोग गरे। योसँगै फ्रान्सले आयोजक जर्मनीलाई २–० ले पराजित गर्दै तेस्रो स्थान सुरक्षित गर्न सफल भएको हो।
एमबाप्पेले पहिलो हाफको अन्त्यतिर रियलका अउरेलियन चाउमेनीको क्रसमा गोल गरे। दोस्रो हाफमा फ्रान्सले सुधारिएको प्रदर्शन गर्यो। एमबाप्पेले वैकल्पिक खेलाडी माइकल ओलिजेलाई ८४औं मिनेटमा गोल गराउन पास दिए र खेलको नतिजा सुनिश्चित गराए।
फ्रान्सका प्रशिक्षक डिडिएर डेस्च्याम्प्सले खेलअघि जर्मनीसँग खेल्न खासै उत्साहित नरहेको बताएका थिए। यो खेलबाट विशेष उपलब्धि हासिल हुने अवस्था थिएन।
दुवै टोलीले सेमिफाइनलमा हारपछि सान्त्वना स्थानका लागि खेल्नुपरेको थियो। जर्मनी बुधबार पोर्चुगलसँग २–१ ले पराजित भएको थियो भने फ्रान्स बिहीबार युरोपियन च्याम्पियन स्पेनसँग ५–४ ले पराजित भयो।
