विपिनको अद्भुतपूर्ण बलिङ

काठमाडौं। युवा स्टार विपिनप्रसाद शर्माको अद्भुतपूर्ण बलिङसँगै कर्णाली प्रदेशले यु–१६ राष्ट्रिय क्रिकेट प्रतियोगितामा पहिलो जित निकालेको छ।

कालिञ्चोक क्रिकेट मैदानमा मंगलबार सम्पन्न खेलमा कर्णालीले सुदूरपश्चिमलाई ५ विकेटले पराजित गरेको हो। पहिलो खेलमा मधेशसँग कर्णाली ९२ रनले पराजित भएको थियो। सुदूरपश्चिमको भने यो लगातार दोस्रो हार हो। पहिलो खेलमा कोशीसँग सुदूरपश्चिम ७ विकेटले पराजित भएको थियो।

सुदूरपश्चिमले दिएको ५६ रनको लक्ष्य पछ्याएको कर्णालीले १८.३ ओभरमा ५ विकेट गुमाउँदै ५९ रन बनायो। कर्णालीका नेत्रविक्रम खत्रीले सर्वाधिक १५ रन बनाए। उनले २० बलमा ३ चौका प्रहार गरे।

त्यसअघि पहिला ब्याटिङ थालेको सुदूरपश्चिमले १६ ओभरमा सबै विकेट गुमाउँदै ५५ रन बनाएको थियो।

सुदूरपश्चिमका ओपनर विक्रम बोहराले सर्वाधिक २१ रन बनाए। २१ बल खेलेका उनले ५ चौका प्रहार गरे। अन्यको प्रदर्शन भने उल्लेख्य रहन सकेन।

सुदूरपश्चिमलाई सस्तैमा रोक्न विपिनले अद्भुतपूर्ण बलिङ गरे। ४ ओभर बलिङ गरेका उनले २ मेडनसहित २ रन खर्चिएर सर्वाधिक ५ विकेट लिए।

विजय बोहराले ३ र नवीन न्यौपानेले दुई विकेट आफ्नो नाममा लेखाए।