आइपिएलले ३ वर्षपछि नयाँ च्याम्पियन पाउँदै

काठमाडौं। इन्डियन प्रिमियर लिग (आइपिएल)ले ३ वर्षपछि नयाँ च्याम्पियन पाउने भएको छ। मंगलबार हुने फाइनलमा पञ्जाब किंग्स र रोयल च्यालेन्जर्स बैंग्लोर भिड्दैछन्। 

दुवै टोली १८ वर्षदेखि उपाधि पर्खिरहेका छन्। खेल अहमदाबादको नरेन्द्र मोदी स्टेडियममा साँझ ७:४५ बजे हुनेछ। आइपिएलले अन्तिम पटक सन् २०२२ मा नयाँ च्याम्पियन पाएको थियो। उक्त फाइनलमा गुजरात टाइटन्सले राजस्थान रोयल्सलाई पराजित गरेको थियो।

बैंग्लोर चौथो पटक र पञ्जाब दोस्रो पटक फाइनलमा पुगेको हो। तर, यो दुई टोलीबीच पहिलो फाइनल हुन लागेको हो। बैंग्लोरले सन् २००९, २०११ र २०१६ मा फाइनल हारेको थियो। पञ्जाबले भने सन् २०१४ मा एक मात्र फाइनल हारेको थियो।

आइपिएलको इतिहासमा हालसम्म बैंग्लोर र पञ्जाबबीच ३६ खेल खेलिएका छन्। दुवैले १८–१८ खेल जितेका छन्। दुवै टोली नरेन्द्र मोदी स्टेडियममा दोस्रो पटक भिड्नेछन्। दुवै यस सिजनको क्वालिफायर–१ मा पनि भिडेका थिए। उक्त खेल बैंग्लोरले ८ विकेटले जितेको थियो। यो सिजनमा यी दुई बीचको चौथो खेल हुनेछ। बैंग्लोरले २ र पञ्जाबले १ खेल जितेको छ।

कप्तान श्रेयस अय्यर पञ्जाब टोलीका सर्वाधिक स्कोरर हुन्। उनले १६ खेलमा ६०३ रन बनाएका छन्। यस सिजनमा उनको उत्कृष्ट स्कोर अहमदाबादको नरेन्द्र मोदी स्टेडियममा अविजित ९७ रन रहेको छ। श्रेयसले क्वालिफायर–२ मा मुम्बई इन्डियन्सविरुद्ध ८७ रनको अविजित इनिङ्स खेलेका थिए। उनी प्लेयर अफ द म्याच पनि चुनिएका थिए। बलिङमा अर्शदीप सिंह टोलीका लागि सर्वाधिक विकेटकर्ता हुन्। उनले १६ खेलमा १८ विकेट लिएका छन्।

बैंग्लोरका सर्वाधिक स्कोरर विराट कोहली हुन्। उनले १४ खेलमा ६१४ रन बनाएका छन्। यस अवधिमा उनले ८ अर्धशतक पनि बनाएका छन्। उनका ओपनिङ पार्टनर फिल साल्टले लगभग हरेक खेलमा टोलीलाई उत्कृष्ट सुरुआत दिएका छन्। तेस्रो नम्बरमा देवदत्त पडिकल र मयंक अग्रवालले पनि आफ्नो जिम्मेवारी राम्रोसँग बुझेका छन्। कप्तान रजत पाटीदार पनि चौथो नम्बरमा प्रभावकारी साबित भएका छन्।

यस सिजनमा बैंग्लोरका फिनिशर पनि उत्कृष्ट फर्ममा छन्। शीर्षक्रम असफल भए पनि जितेश शर्मा, रोमारियो शेफर्ड र टिम डेभिडले महत्त्वपूर्ण खेलमा ब्याटिङबाट योगदान दिएका छन्। जितेशले क्वालिफायरअघि अविजित ८५ रन बनाएर बैंग्लोरलाई जित दिलाएका थिए।

अघिल्ला हरेक सिजनमा बैंग्लोरको बलिङलाई टोलीको सबैभन्दा ठूलो कमजोरी मानिन्थ्यो, विशेष गरी डेथ ओभरमा। यद्यपि, भुवनेश्वर कुमार, जोश हेजलवुड र यश दयालको यो कमजोरीलाई पूर्ण रूपमा हटाएका छन्। हेजलवुडले यस सिजनमा २१ विकेट लिएका छन् भने भुवनेश्वरले १५ विकेट लिएका छन्। 

यश दयालले पनि १२ विकेट लिएका छन्। मध्य ओभरमा सुयश शर्मा र कृणाल पाण्ड्या टोलीको सबैभन्दा ठूलो शक्ति बनेर उभिएका छन्।