पथरीशनिश्चरे र दमक विजयी

पथरी, मोरङ। प्रथम कञ्चनजंघा क्रिकेट प्रतियोगिताको मंगलबार भएको खेलमा पथरीशनिश्चरे क्रिकेट क्लब र दमक क्रिकेट क्लब विजयी भएको छन्। पथरीशनिश्चरेले पञ्चध्वज क्रिकेट क्लब मोरङलाई चार विकेटले पराजित गरेको हो।

जिरीखिम्ती मैदानमा भएको पहिलो खेलमा टस जितेर पहिला ब्याटिङ रोजेको पञ्चध्वज क्रिकेट क्लबले २० ओभरमा सात विकेट गुमाउँदै १३५ रन बनाएको थियो। पञ्चध्वजका भूपेन राईले सर्वाधिक ३७ रन बनाए। राकेश राई र राजकुमार मगरले समान १० रनको योगदान दिए।

पथरीशनिश्चरेका नेल्सन दंगाल, अभिषेक विक  बाला र रोहन गहतराजले समान २–२ विकेट लिए। लक्ष्य पछ्याउन उत्रिएको पथरीशनिश्चरेले १७ ओभर पाँच बलमा ६ विकेट गुमाउँदै लक्ष्य पूरा गर्‍यो। 

समित राईले आक्रामक इनिङ्स खेल्दै ७२ रन बनाए भने सोलोमन राईले १९ र योगेश श्रेष्ठले १३ रन जोडे। पञ्चध्वजका सञ्जय मुर्मु, भूपेन राई र पवन जैशवालले समान १–१ विकेट लिए।

मंगलबार नै भएको दोस्रो खेलमा दमक क्रिकेट क्लबले केराबारी क्रिकेट क्लबलाई १७१ रनको फराकिलो रनले पराजित गर्‍यो। टस हारेर पहिला ब्याटिङ गरेको दमक क्रिकेट क्लबले निर्धारित २० ओभरमा पाँच विकेटको क्षतिमा २४१ रन को विशाल योगफल तयार गर्‍यो। 

दमकका विजय तामाङले उत्कृष्ट प्रदर्शन गर्दै शतक प्रहार प्रहार गरे। उनले १०६ रन बनाउँदा बोधराज आचार्यले ४६ र प्रदीप परियारले ३९ रनको योगदान दिए।
केराबारी क्रिकेट क्लबका अभिषेक थापाले तीन विकेट लिए भने शशी मण्डल र सनम सुवेदीले १–१ विकेट लिए।

जवाफमा मैदान उत्रिएको केराबारी क्लब  ७० रनमै समेटियो। दमकका बलरसामू निरीह बनेका केराबारीका सञ्जय राईले १४ र सनम सुवेदीले १६ रन बनाउनुबाहेक अन्य ब्याटर दोहोरो अंकको रन बनाउन सकेनन्। 

केराबारीलाई सस्तैमा समेटन दमकका बलर अनीश खड्काले चार विकेट लिए भने चन्दन शर्मा र सन्तोष सिंहले समान २–२ विकेट लिँदा किरण गौतमको नाममा  १ विकेटको योगदान रह्यो।

खेलको म्यान अफ द म्याच दमकका विजय तामाङ घोषित भए। बुधबारबाट दोस्रो चरणका खेल सुरु हुनेछन्। पहिलो खेल काँकडभिट्टा झापा र मोरङको डाँस मोरङीबीच हुने छ भने दोस्रो खेल हसहन्द क्रिकेट क्लब र ब्रर्दर्स ११ झापाबीच हुनेछ।