ब्वाइज युनियनले टार्‍यो रेलिगेसन खतरा

काठमाडौं। ब्वाइज युनियन क्लबले सहिद स्मारक ‘बी’ डिभिजन लिगमा रेलिगेसन खतरा टारेको छ।

सातदोबाटोस्थित एन्फा कम्प्लेक्समा मंगलबार सम्पन्न खेलमा ब्वाइज युनियनले श्रीकुमारी क्लबलाई ५–३ ले पराजित गरेको हो।

यो नतिजासँगै तेस्रो स्थानमा उक्लिएको ब्वाइज युनियनले ११ खेलबाट १८ अंक पुर्‍याएको छ। समान खेलबाट कुमारीको १३ अंक छ। कुमारीलाई अझै रेलिगेसनको खतरा यथावत् छ।

ब्वाइज युनियनको जितमा दिव्यविक्रम चौधरीले दुई गोल गरे। सुजित बूढाथोकी, विनोद राई र सुशान्त लामाले समान एक गोल थपे।

कुमारीका पाल्देन तामाङ, अरुण शाह र यमन महर्जनले गोल गरे पनि हारबाट जोगाउन सकेनन्।