बार्सिलोनासँगको खेलमा भिनिसियस र लुकास घाइते

काठमाडौं। रियल मड्रिडका फरवार्ड भिनिसियस जुनियरको बायाँ खुट्टाको घुँडामा चोट लागेको क्लबले सोमबार पुष्टि गरेको छ।

भिनिसियस आइतबार ला लिगामा बार्सिलोनासँगको ४–३ को पराजयमा घाइते भएका थिए। उनीलाई मोंजुइक रंगशालामा भएको क्लासिकोको अन्त्यतिर प्रतिस्थापन गरिएको थियो।

सोही खेलमा अर्का खेलाडी लुकास भास्क्वेजले पनि चोट बोकेका छन्। तर, क्लबले यी दुवै खेलाडीको पुनरागमनको समयबारे केही खुलाएको छैन।

यस सिजन रियलले ला लिगाअन्तर्गत अब तीन खेल मात्र बाँकी छ। बुधबार मल्लोर्काविरुद्ध, आइतबार सेभियाविरुद्ध र मे २५ मा रियल सोसिडाडविरुद्ध खेल्ने छ। 

त्यसपछि क्लबले आगामी महिना संयुक्त राज्य अमेरिकामा आयोजना हुने क्लब विश्वकपमा पनि सहभागिता जनाउने छ।