नेपाल–भारतको नजर समूह विजेतामा
इटानगर (भारत)। नेपाल र भारतको यु–१९ टोलीका युवा खेलाडीहरू मंगलबार अरुणाचल प्रदेशको युपियास्थित गोल्डेन जुबिली रंगशालामा भिड्दैछन्।
यो समूहको साफ च्याम्पियनसिपमा तेस्रोपल्ट आमुन्नेसामुन्ने हुँदा यी दुई टोलीको ध्यान भने समूह ‘बी’ को शीर्ष स्थान कब्जा गर्नेमा केन्द्रित हुनेछ। पहिले नै सेमिफाइनलको स्थान सुरक्षित गरिसकेका दुवै टोलीका लागि यो अन्तिम समूह चरणको खेल निर्णायक बन्नेछ।
नेपाली टोलीका मुख्य प्रशिक्षक उर्जन श्रेष्ठको टोली आफ्नो बलियो प्रदर्शन जारी राख्ने लक्ष्यमा हुनेछ। तर, नेपालले एक खेलअगाबै सेमिफाइनलमा आफ्नो स्थान सुरक्षित गरिसके पनि भारतसँग हलुका नखेल्ने बताएका छन्।
‘भारत र नेपालको टोलीमा खासै त्यस्तै फरक छैन। भारतीय टोली पनि राम्रो छ। हामी दुवै टोली सेमिफाइनल पुगिसकेका छौं। त्यसलै टप नै खेल्छौं,’ उनले भने। नेपाल र भारत यो उमेर समूहको दुई संस्करणमा दुवैपल्ट भिडेका छन्।
सन् २०१५ मा सातदोबाटोस्थित एन्फा कम्प्लेक्समा भएको प्रतियोगितामा घरेलु टोली नेपालले पेनाल्टी सुटआउटमा ५–४ को जित निकाल्दै उपाधि नै हात पारेको थियो। त्यसको आठ वर्षपछि अर्थात २०२३ त्रिपुरेश्वरस्थित दशरथ रंगशालामा भएको दोस्रो भेटमा भने भारतले उसैगरी बदला लिँदै पेनाल्टी सुट आउटमा नेपाललाई ३–२ ले पाखा लगाउँदै फाइनलमा स्थान बनायो र उपाधि नै हात पार्यो।
उक्त खेलमा पेनाल्टी सदुपयोग गर्न नसकेका लछु थापाले यसपल्ट पनि टोलीमा निरन्तरता पाएका छन्। अझ उनी यसपल्ट आफ्नै दाजु रामको कप्तानीमा मैदान उत्रिरहेका छन्। उनले श्रीलंकाविरुद्धको ५–० को जितमा एक गोलको योगदानसमेत दिएका थिए।
यसपल्ट भारतले प्रतियोगितामा सानदार सुरुआत गरेको छ। पहिलो खेलमै भारतले प्रतियोगिताकै कमजोर टोली श्रीलंकाविरुद्ध ८–० को फराकिलो जित निकालेको थियो। त्यसैले भारतसँगको समूहचरणको अन्तिम खेल त्यति सहज नहुने टोलीका स्ट्राइकर सुजन डंगोल बताउँछन्। तर, उपाधि जित्ने लक्ष्यसाथ आएको कारण भारतको चुनौतीलाई चिर्नैपर्ने उनको भनाइ छ।
‘हामीले अघिल्लो संस्करणमा पनि भारतलाई हराउन सकेका थिएनौं। त्यसैले योपल्ट जसरी पनि हराउने लक्ष्य लिएका छौं। प्रशिक्षकले जस्तो रणनीति बनाउनु भएको छ त्यसरी नै खेल्छौं,’ उनले खेलपाटीसँग भने।
भारतलाई समूह विजेता बन्न गोलरहित बराबरीको नतिजा नै पर्याप्त हुनेछ। तर, नेपाललाई जितको विकल्प हुनेछैन। अझ भारतले नेपालभन्दा ४८ घन्टा बढी विश्राम र तयारीको समय पाएको थियो। त्यसले पनि थप लाभ पुग्नेछ। यद्यपि, भारतका मुख्य प्रशिक्षक बिबियानो फर्नान्डिस नेपाललाई नतिजा उल्टो सक्षम टोली मान्छन्।
‘दुवै टोलीले आफ्नो पहिलो खेल ठूलो अन्तरले जितेका छन्। तर, हामी स्कोरलाइनलाई धेरै महत्व दिंदैनौं। प्रत्येक खेल फरक हुन्छ। नेपाल राम्रो संगठित टोली हो। श्रीलंकाविरुद्ध राम्ररी खेलेको थियो र थुप्रै मौका सिर्जना गरेको थियो,’ उनले भने।
नेपालले पहिलो हाफको निर्धारित समयसम्म आधा दर्जनभन्दा बढी मौका सिर्जना गरेको थियो। तर, फिनिसिङमा चुक्दा सहज अग्रता लिन असफल भएको थियो। तर, पहिलो हाफको चार मिनेटको इन्जुरी समयको अन्तिम मिनेटमा सुजनले नेपालका लागि ‘ब्रेक थ्रु’ दिलाएका थिए।
दोस्रो हाफमा भने नेपालले फिनिसिङमा सुधार गर्दै ४ गोल थपेको थियो। यी गोल धर्वेन्द्र कुँवर, सुवास बम, विज्ञान खड्का र लछु थापाले गरेका हुन्। पहिलो हाफमा एक गोल गरेको नेपालले दोस्रो हाफमा चार गोल थपेको थियो।
‘हामीले नेपालको खेल विश्लेषण गरेका छौं र कत्तिको प्रतिस्पर्धी हुन् भन्ने बुझेका छौं। हाम्रो लागि मुख्य कुरा भनेको आफ्नै बलमा खेल्नु, केन्द्रित रहनु र उत्कृष्ट प्रदर्शन गर्नु हो। यस स्तरमा सबै टोली बलिया हुन्छन्। अन्ततः जित्ने चाहना कसमा बढी छ भन्ने कुराले अन्तर पार्छ,’ उनले थपे।
४८ वर्षीय प्रशिक्षक फर्नान्डिस भारतको पहिलो खेलबाट सन्तुष्ट देखिएका छन्। विशेषतः डेनी मैतेई नेपालका लागि खतरा बन्न सक्छन्। उनले श्रीलंकाविरुद्ध ह्याट्रिक गरेका थिए।
श्रीलंकाविरुद्ध भारतले निकालेको ८–० को नतिजा पुरुष उमेर समूहको साफ प्रतियोगितामा अहिलेसम्मकै सबैभन्दा ठूलो जित हो। यसअघि यु–२० टोलीले सन् २०२२ मा नेपाललाई र यु–१७ टोलीले सन् २०२३ मा माल्दिभ्सलाई समान ८–० ले पराजित गरेका थिए।
