असाधारण यमल
काठमाडौं। इतिहासकै रोमाञ्चक ‘एल क्लासिको’ मध्ये एकमा बार्सिलोनाले आइतबार राति रियल मड्रिडविरुद्ध ४–३ को अविश्वसनीय पुनरागमन जित निकाल्यो।
मोंजुइकस्थित एस्टादी ओलिम्पिक लुइस कम्पनीस रंगशालामा सम्पन्न यो खेल ३० मिनेटको तीव्र तथा नाटकीय पहिलो हाफ र १७ वर्षीय लमिन यामालको अद्भुत प्रदर्शनले परिभाषित भयो।
रियलका नयाँ स्टार किलियन एम्बाप्पेले १४ मिनेटभित्र दुई गोल गर्दा सुरुआतमै घरेलु समर्थकहरू स्तब्ध बने। योसँगै बार्सिलोना दबाबमा परेको थियो।
तर, त्यसपछि मैदानमा देखिएको ब्लाउग्रा जादुले ‘एल क्लासिको’को इतिहासमै एक अविस्मरणीय घडी ल्यायो। जसको केन्द्रमा थिए, किशोर खेलाडी लमिन यमल।
एरिक गार्सियाले हेडरमार्फत पहिलो गोल फर्काएपछि यमलले खेलको सबैभन्दा सुन्दर क्षण पस्किए। सम्भवतः सिजनकै उत्कृष्ट गोल।
पेनाल्टी बक्सको छेउबाट उनले एक संयमित टच लिएर गोलकिपर कोर्ट्वालाई छक्याउँदै बान्का प्रहार गरे र खेल २–२ बराबरीमा ल्याए। त्यो गोलले मोंजुइक रंगशालामा बार्सिलोनाका समर्थकहरूलाई निकै उत्साहित भएका थिए।
तर, यमलको प्रभाव त्यहीँसम्म सीमित रहेन। उनी दायाँ विंगबाट लगातार खतरा बनिरहेका थिए, जसले रियलको डिफेन्सलाई बारम्बार विचलित गर्यो। उनीबाट सुरु भएका आक्रमणहरूले राफिन्हाको पहिलो गोल पनि सुनिश्चित गर्यो।
योसँगै बार्सिलोनाले पहिलो हाफको अन्त्यमा ३–२ को अग्रता लियो। रियलविरुद्ध बार्सिलोनाले पहिलोपटक पहिलो हाफमै २–० को अग्रता लिएको थियो।
बार्सिलोनाका प्रशिक्षक हान्सी फ्लिकले यमलबारे भने, ‘उनी अद्भुत रूपमा खेलिरहेका छन्। उनीभित्र आत्मविश्वास छ अनि निकै चतुर पनि छन्। १७ वर्षको उमेरमै यति गुण भएको खेलाडी पाउनु असाधारण कुरा हो।’
दोस्रो हाफमा राफिन्हाले अर्को गोल गर्दै आफ्नो ब्रेस पूरा गरे, जुन अन्ततः विजयी गोल बन्यो। यद्यपि, रियलले अन्तिमतिर रोड्रिगोमार्फत एक गोल फर्कायो। तर, त्यो अपुग रह्यो। यो खेल बार्सिलोनाको जुझारूपनको उदाहरण मात्र होइन, यमलको उदयको प्रतीक पनि बन्यो।
फ्लिकको टोलीले यस सिजन चारवटै ‘एल क्लासिको’ जितेको दुर्लभ कीर्तिमान पनि बनायो। यसअघि बार्सिलोनाले बर्नबेउमा ४–०, सुपर कपमा ५–२ र कोपा डेल रेमा ३–२ को जित निकालेको थियो। आइतबारको जितले बार्सिलोनालाई ला लिगा उपाधिनजिक पुर्याएको छ।
यो सिजन फ्लिकको प्रशिक्षणमा बार्सिलोनाले छैटौंपल्ट पुनरागमन गर्दै खेल जितेको हो। यसअघि भ्यालेन्सिया, रायो भालेकानो, एट्लेटिको मड्रिड, सेल्टा र भालाडोलिडविरुद्ध यस्तै पुनरागमन भएको थियो। तर, आइतबारको जितमा भएको ऐतिहासिक भार र भावनात्मक गहिराइ अरू कुनै पनि खेलमा थिएन।
अब यमलको नाम ‘एल क्लासिको’को किंवदन्तीमा दरिएको छ।१७ वर्षको उमेरमै उनी बार्सिलोनाको भविष्य मात्रै होइनन्, वर्तमान पनि बनेका छन्।
