काठमाडौं। लोकेश बम, साहब आलम, बसिर अहमद र नन्दनकुमार यादवले नेपाली राष्ट्रिय टोलीमा पुनरागमन गरेका छन्।
नेपाल क्रिकेट संघ (क्यान)ले हङकङमा हुने टी-२० आई सिरिजका लागि यी चार खेलाडीलाई टोलीमा समेटेको हो। यी खेलाडी लामो समयदेखि राष्ट्रिय टोलीबाहिर थिए।
सिरिज ९ अप्रिलदेखि १३ अप्रिलसम्म हुने तय छ। सिरिजमा नेपाल र घरेलु टोली हङकङसहित कतार र कुवेतले सहभागिता जनाउने छन्।
नेपालले कतारसँग खेल्दै प्रतियोगिताको सुरुआत गर्नेछ। दोस्रो खेल अप्रिल १० मा कुवेत र तेस्रो तथा अन्तिम खेल अप्रिल १२ मा हङकङसँग खेल्नेछ।
लिग चरणमा शीर्ष दुई टोलीले फाइनल खेल्ने छन्। तेस्रो र चौथो स्थानमा रहने टोलीले तेस्रो स्थानका लागि प्रतिस्पर्धा गर्नेछन्।
विकेटकिपर ब्याटर लोकेशले अन्तिमपल्ट १३ मार्च २०२४ मा पपुवा न्यूगिनीविरुद्ध खेलेमा थिए। त्यसयता उनी टोलीमा पर्न सकेका थिएनन्।
स्पिनर सहबले भने करिब तीन वर्षपछि टोलीमा पुनरागमन गरेका हुन्। उनले अन्तिमपल्ट २९ अगस्ट २०२४ मा केन्याविरुद्ध खेलेका थिए।सहबजस्तै अलराउन्डर बसिरले पनि लामो समयपछि टोलीमा स्थान बनाएका हुन्। उनले अन्तिमपल्ट केन्यासँगै खेलेका थिए।
अर्का अलराउन्डर नन्दन पनि टोलीमा समेटिएका छन्। तर, उनले डेब्यु गर्न बाँकी छ।
