पहिलो खेलमा नेपाली टोलीको लज्जास्पद हार

काठमाडौं। नेपाली यु–१९ क्रिकेट टोली एकदिवसीय शृंखलामा अफगानिस्तानसँग पराजित भएको छ।

बिहीबार सम्पन्न पहिलो खेलमा नेपाल १३० रनले पराजित भएको हो। जितसँगै अफगानिस्तानले तीन खेलको शृंखलामा १–० को अग्रता लिएको छ।

अफगानिस्तानले दिएको ३०१ रनको लक्ष्य पछ्याएको नेपालले ४६.२ ओभरमा सबै विकेट गुमाउँदै १७० रन मात्रै बनाउन सक्यो।

नेपालका नीरजकुमार यादवले सर्वाधिक ५३ रन बनाए। ६१ बल खेलेका उनले चार चौका र दुई छक्का प्रहार गरे। 

सन्तोष यादव र अशोक धामीले २४/२४, अभिषेक तिवारीले १७, कप्तान नरेन भट्टले १३ र सिब्रिन श्रेष्ठले ११ रन बनाए। अन्य खेलाडीले भने दोहोरो अंकमा रन बटुल्न सकेनन्।

अफगानिस्तका वाहिदउल्लाह जाद्रान, जियातउल्लाह शहीन र कप्तान महबुब खानले समान दुई विकेट लिए।

त्यसअघि माथिल्लो मूलपानी किकेट मैदानमा टस जितेर ब्याटिङ रोजेको अफगानिस्तानले निर्धारित ५० ओभमा नौ विकेट गुमाउँदै ३०० रन बनाएको थियो।

अफगानिस्तानका फैसल खान शिनोजादाले सर्वाधिक ९७ रन बनाए। ८८ बल खलेका उनले नौ चौका र चार छक्का प्रहार गरे।

खालिद अहमदजाई ७६, बर्खत इब्राहिमजाई ३५, उजाइरुल्लाह २४ र अजिज मिय खहिल २१ रनमा आउट भए।

नेपालका सन्तोष यादवले सर्वाधिक तीन विकेट लिए।