काठमाडौं। प्रभसिमरन सिंह र कप्तान श्रेयस अय्यरको सानदार ब्याटिङसँगै पञ्जाब किङ्सले इन्डियन प्रिमियर लिग (आइपिएल) मा अपराजित यात्रा कायम राखेको छ।
मंगलबार सम्पन्न खेलमा पञ्जाबले लखनउ सुपर जायन्ट्सलाई आठ विकेटले पराजित गरेको हो। यो नतिजासँगै पञ्जाब दुई खेलबाट चार अंक बटुल्दै शीर्ष दुईमा उक्लिएको छ।
पञ्जाबले यसअघि गुजरात टाइटन्सलाई ११ रनले हराएको थियो। लखनउको भने यो लगातार दोस्रो हार हो। लखनउले तीन खेलबाट दुई अंक जोडेको छ।
लखनउले दिएको १७२ रनको लक्ष्य पछ्याएको पञ्जाबले १६.२ ओभरमा दुई विकेट गुमाउँदै १७७ रन बनायो। पञ्जाबका प्रभसिमरनले सर्वाधिक ६९ रन बनाए। ३४ बल खेलेका उनले नौ चौका र तीन छक्का प्रहार गरे।
कप्तान अय्यरले भने लगातार अर्धशतक पूरा गरे।अविजित रहेका उनले ३० बलमा तीन चौका र चार छक्कासहित ५२ रन बनाए। यसअघि उनले गुजरातविरुद्ध अविजित ९७ रन बनाएका थिए।
नेहाल भाधेरा ४३ रनमा अविजित रहँदा प्रयान्स आर्या आठ रनमा पभिलियन फर्किए। लखनउका दिग्वेश राठीले दुई विकेट लिए। चार ओभर बलिङ गरेका उनले ३० रन खर्चिए।
त्यसअघि भारतरत्न श्री अटल बिहारी वाजपेयी एकना क्रिकेट स्टेडियम लखनउमा टस हारेर पहिला ब्याटिङ थालेको लखनउले निर्धारित २० ओभरमा सात विकेट गुमाउँदै १७१ रन बनाएको थियो। लखनउका निकोलस पुरनले सर्वाधिक ४४ रन बनाए। ३० बल खेलेका उनले पाँच चौका र दुई छक्का प्रहार गरे।
आयुष बडानीले ३३ बलमा एक चौका र तीन छक्कासहित ४१ रन बनाए। एडन माक्रराम २८, अब्दुल समाद २७ र डेभिड मिलर १९ रनमा आउट हुँदा अन्यले दोहोरो अंकमा रन बटुल्न सकेनन्।
पञ्जाबका अर्शदीप सिंहले सर्वाधिक तीन विकेट लिए। चार ओभर बलिङ गरेका उनले ४३ रन खर्चिए। लोक्की फर्गुसन, ग्लेन म्याक्सवेल, मार्को जोन्सन र युजवेन्द्र चाहलको नाममा समान एक विकेट रह्यो।
