काठमाडौं। एस्टन भिल्लाले सन् १९९६ पछि कुनै ठूलो उपाधि जितेको छैन।
तर, यस सिजन ६८ वर्षपछि एफए कप जित्ने राम्रो मौका मिलेको छ। यसपटक इङ्लिस प्रिमियर लिगका थुप्रै ठूला टोलीहरू प्रतियोगिताबाट बाहिरिसकेका छन्।
तर, भिल्ला मार्कस रासफोर्डको पहिल गोलसँगै प्रेस्टनलाई ३–० ले पराजित गर्दै सन् २०१५ पछि पहिलो पटक एफए कप सेमिफाइनलमा प्रवेश गरेको छ।
म्यानचेस्टर युनाइटेडबाट फेब्रुअरी २ मा ऋण सम्झौतामा रासफोर्ड भिल्ला आएका थिए। उनले आफ्नो करियर पुनःउत्थान गर्दै इङ्ल्यान्डको टोलीमा पनि पुनरागमन गरेका छन्। हालै सम्पन्न विश्वकप छनोट खेलमा उनले अल्बानिया र लाट्भियाविरुद्ध इङ्ल्यान्डको सुरुआती टोलीमा स्थान बनाएका थिए।
रासफोर्डले खेलको ५८औं मिनेटमा लुकास डिग्नेको क्रसमा ट्याप गर्दै पहिलो गोल गरे। त्यसपछि ६३औं मिनेटमा पेनाल्टीमा गोल गर्दै भिल्लालाई दुई गोलको अग्रता दिलाए। ७१औं मिनेटमा ज्याकोब राम्जीले तेस्रो गोल गर्दै भिल्लालाई सहज जित दिलाए।
शनिबार क्रिस्टल प्यालेस र नटिङ्घम फरेस्टले सेमिफाइनल प्रवेश गरिसकेका छन्। अब भिल्लाले फाइनलमा स्थान बनाउन क्रिस्टल प्यालेसलाई चुनौती प्रस्तुत गर्नेछ। नटिङ्घम फरेस्टले भने बर्नमाउथ र म्यानचेस्टर सिटीबीचको विजेतासँग खेल्नेछ।
यदि सिटी पराजित भएमा एस्टन भिल्ला प्रतियोगिताको प्रमुख दावेदार बन्ने छ। क्लबले स्पेनिस प्रशिक्षक उनाई एमरीको नेतृत्वमा उत्कृष्ट प्रदर्शन गरिरहेको छ। यस सिजन च्याम्पियन्स लिगको क्वार्टरफाइनलमा पुगेको छ।
भिल्लाले सात पटक एफए कप जितेको छ। तर, सन् १९५७ पछि उपाधि उचाल्न सकेको छैन। क्लब पछिल्लो पटक सन् २०१५ को फाइनलमा आर्सनलसँग ४–० ले पराजित भएको थियो।
प्रेस्टन एफए कप क्वार्टरफाइनलमा पुग्ने एक मात्र गैरप्रिमियर लिग क्लब थियो। क्लबले सन् १९६५–६६ पछि पहिलो पटक क्वार्टरफाइनल खेलेको हो।
एफए कप सेमिफाइनलका खेल वेम्बली स्टेडियममा हुनेछ।
