काठमाडौं। नेपाल क्रिकेट संघ (क्यान)ले ओपनर अनिलकुमार साह र लेग स्पिनर सन्दीप लामिछानेलाई बाहिर राख्दै टी–२० आई सिरिजका लागि २० खेलाडीलाई बन्द प्रशिक्षणमा बोलाएको छ।
क्यानले शनिबार हङकङमा हुने सिरिजका लागि २० खेलाडीलाई बन्द प्रशिक्षणमा बोलाएको हो। तर, प्रशिक्षणमा बोलाइएको खेलाडीको सूचीमा नियमित ओपनर अनिलसँग लेग स्पिनर सन्दीपको नाम भने समावेश छैन।
अनिलले शनिबार सम्पन्न प्रधानमन्त्री कप एकदिवसीय क्रिकेट प्रतियोगितामा मधेश प्रदेशको कप्तानी गरेका थिए। उनको नेपाल प्रिमियर लिग (एनपिएल) मा हात भाँचिएको थियो। तर, रिकभर भएर फर्किएका उनले नौ इनिङ्स खेल्दै २२६ रन बनाएका थिए। यसक्रममा उनले दुई अर्धशतक प्रहार गरेका थिए। तर, हातको चोट पुन: बल्झिएको कारण उनी बन्द प्रशिक्षणमा नफर्किएका हुन्।
यस्तै, सन्दीपले भने हर्नियाको अप्रेसनका कारण प्रधानमन्त्री कपमा सहभागिता जनाएनन्। उनी अझै रिकभर भएका छैनन्। यी दुई मुख्य खेलाडी बाहिरिँदा किरण ठगुन्ना, दीपेन्द्र रावत, रुपेश सिंह र अर्जुन घर्तीजस्ता नयाँ खेलाडीले स्थान बनाएका छन्।
क्यानका अनुसार ९ देखि १३ अप्रिलसम्म हुने सिरिजमा नेपाल र घरेलु टोली हङकङसहित कतार र कुवेतले सहभागिता जनाउने छन्।
नेपालले कतारसँग खेल्दै प्रतियोगिताको सुरुआत गर्नेछ। दोस्रो खेल अप्रिल १० मा कुवेत र तेस्रो तथा अन्तिम खेल अप्रिल १२ मा हङकङसँग खेल्नेछ।
लिग चरणमा शीर्ष दुई टोलीले फाइनल खेल्ने छन्। तेस्रो र चौथो स्थानमा रहने टोलीले तेस्रो स्थानका लागि प्रतिस्पर्धा गर्नेछन्।
