१७ वर्षपछि चेन्नईको मैदानमा बैंग्लुरुको जित

काठमाडौं। रोयल्स च्यालेन्जर्स बैंग्लुरुले इन्डियन प्रिमियर लिग (आइपिएल)मा चेन्नई सुपर किङ्समाथि ऐतिहासिक जित निकालेको छ। 

शुक्रबार सम्पन्न दोस्रो खेलमा बैंग्लुरु ५० रनले विजयी भएको हो। चेन्नईको घरेलु मैदान चेपकमा बैंग्लुरुले १७ वर्षपछि जित निकाल्न सफल भएको हो।

बैंग्लुरुले पहिलो सिजनमा चेन्नईलाई चेपकमा १४ रनले पराजित गरेको थियो। त्यसयता बैंग्लुरुले यो मैदानमा जित निकाल्न सकेको थियो। तर, यसपल्ट बैंग्लुरु नतिजा उल्टाउन सफल रह्यो। चेन्नईले पहिलोपल्ट बैंग्लुरुसँग यति ठूलो हार बेहोरेको हो। 

यसअघि सन् २०२० मा बैंग्लुरुले चेन्नईलाई ३७ रनले हराएको थियो। यो नै बैंग्लुरुले कुनै पनि मैदानमा लक्ष्य रक्षा गर्न हात पारेको सबैभन्दा ठूलो जित थियो।

बैंग्लुरुले २०२५ सिजन उत्कृष्ट सुरुआत गरेको छ। बैंग्लुरुले पहिलो खेलमा डिफेन्डिङ च्याम्पियन कोलकाता नाइट्स राइडर्सलाई सात विकेटले पराजित गरेको थियो। योसहित बैंग्लुरु शीर्ष स्थानमा उक्लिएको छ। चेन्नईको भने यो सिजन पहिलो हार हो।

पहिलो खेलमा चेन्नईले मुम्बई इन्डियन्सलाई चार विकेटले पराजित गरेको थियो। चेन्नई दुई अंकसहित सातौं स्थानमा छ। बैंग्लुरुले प्रस्तुत गरेको १९७ रनको लक्ष्य पछ्याएको चेन्नईले निर्धारित २० ओभरमा आठ विकेटको क्षतिमा १४६ रन मात्र बनाउन सक्यो। 

चेन्नईका ओपनर रचिन रवीन्द्रले सर्वाधिक ४१ रन बनाए। ३१ बल खेलेका उनले पाँच चौका प्रहार गरे। रवीन्द्र जडेजाले १९ बलमा दुई चौका र एक छक्कासहित २५ रनको योगदान दिए पनि हारलाई टार्न सकेनन्।

शिभव दुवे १९ रनमा आउट हुँदा महेन्द्रसिंह धोनी ३० रनमा अविजित रहे। अन्य ब्याटरको प्रदर्शन भने उल्लेख्य रहेन।

बैंग्लुरुका जोश हेजलवुडले सर्वाधिक तीन विकेट लिए। चार ओभर बलिङ गरेका उनले २१ रन खर्चिए। यश दयाल र लियाम लिभिङस्टनले समान दुई विकेट लिँदा भुवनेश्वर कुमारको नाममा एक विकेट रह्यो।

त्यसअघि चेपकस्थित एमए चिदामबरम स्टेडियममा टस हारेर पहिला ब्याटिङको निम्तो पाएको बैंग्लुरुले निर्धारित २० ओभरमा सात विकेट गुमाउँदै १९६ रनको योगफल तयार गरेको थियो। 

बैंग्लुरुका कप्तान रजत पाटीदारले सर्वाधिक ५१ रन बनाए। ३२ बल खेलेका उनले चार चौका र तीन छक्का प्रहार गरे। फिल साल्ट ३२, विराट कोहली ३१, देव दत्तपडिकल २७ र जितेश शर्मा १० रनमा आउट हुँदा टिम डेभिड २२ रनमा अविजित रहे।

अन्यको ब्याट भने चल्न सकेन। चेन्नईका नूर अहमदले सर्वाधिक तीन विकेट लिए। चार ओभर बलिङ गरेका उनले ३६ रन खर्चिए।