राखेपको बोर्ड बैठक शुक्रबार

काठमाडौं।  नेपाली खेलकुदको नियामक निकाय राष्ट्रिय खेलकुद परिषद् (राखेप) बोर्ड बैठक यसै साता बस्ने भएको छ ।

 राष्ट्रिय खेलकुद विकास ऐन २०७३ को दफा १० को उपदफा (२) र (३) बमोजिम ११८ औं बोर्ड बैठक शुक्रबार बस्न लागिएको हो। नेपाली कांग्रेसबाट युवा तथा खेलकुदमन्त्रीको पद सम्हालेका तेजुलाल चौधरीले आफ्नो कार्यकालमा पहिलोपल्ट बैठक आह्वान गरेका हुन्।

राखेपको बोर्ड बैठक १४ महिनापछि बस्न लागेको हो । वर्षमा कम्तिमा दुई पटक बोर्ड बैठक बस्ने कानुनी व्यवस्था भएपनि बैठक बस्न सकेको थिएन ।

वर्तमान खेलकुद मन्त्री तेजुलाल चौधरीले आफु अनुकुल समिकरण नबनेपछि बोर्ड बैठक टार्दै आएका थिए । राखेपको बोर्ड बैठक बोलाउन चौतर्फी दबाब बढेपछि अन्तत खेलकुद मन्त्री बैठक बोलाउने निष्कर्शमा पुगेका हुन् । 

लामो समय बैठक नबस्दा राखेपकै बोर्ड सदस्यले सार्वजनीक रुपमा असन्तुष्टि पोख्न थालेका थिए भने प्रदेश खेलकुद विकास परिषद्का सदस्य सचिवहरुले समेत औपचारिक पत्र लेख्दै बैठकको माग गर्न थालेका थिए । 

खेलकुद मन्त्रालय सम्हालेपछि काम भन्दा विवादमा देखिएका खेलकुद मन्त्रीले खासै जिम्मेवारी सम्हाल्न सकेका छैनन् । 

दशौं राष्ट्रिय खेलकुद प्रतियोगितामा समयमै गर्न चुकेका मन्त्री चौधरीले मन्त्रालयको रुपमा कुनै नयाँ काम अघि बढाउन सकेका छैनन् । जिम्मेवारीको हिसाबले उनले राखेपकै उपाध्यक्ष ल्याउन सकेका छैनन् भने रिक्त बोर्ड सदस्यको पदपुर्ती समेत गर्न सकेका छैनन् । खेलकुद विकास ऐन विपरित नेपाल ओलम्पिक कमिटिले विधान संशोधन गरेर निर्वाचन गर्न खोजेपनि सरकार र मन्त्रालयको भुमिका प्रतिक्रिया विहीन देखिन्छ । 

बैठकमा १०औं राष्ट्रिय खेलकुद प्रतियोगिता, राष्ट्रिय खेलकुद प्रतियोगिता सञ्चालन निर्देशिका २०७९ संशोधन, प्रथम पारा राष्ट्रिय खेलकुद र विश्वविद्यालय खेलकुद सम्बन्धमा छलफल हुने अजेन्डा राखिएको छ। 

यस्तै, जुनियर विद्यालय खेलकुद प्रतियोगिता कार्यविधि, राष्ट्रपति रनिङ्ग शिल्ड, राखेप विनियमावली, राष्ट्रिय खेलकुद परिषद् कर्मचारीहरूको सेवाका शर्त र सुविधासम्बन्धी विनियमावली, २०५०, आर्थिक प्रशासनसम्बन्धी विनियमावली २०६१ लगायतमा पनि छलफल हुने बताइएको छ।