आफ्नै रेकर्ड तोड्दै अर्जुन बने विजेता

काठमाडौँ। नेपालकै लामो ट्रेल रेस प्रतियोगिता ‘मञ्जुश्री ट्रेल रेस’को चौथो संस्करणको उपाधि अर्जुन कुलुङ राईले जितेका छन्।

२६ घन्टा ५० मिनेट १५  सेकेन्डमा रेस पूरा गर्दै उनले यसअघिको आफ्नै रेकर्ड तोड्दै उपाधि जितेका हुन्। कुलुङले सन् २०२२ मा ३१ घन्टा १० मिनेट ५७ सेकेन्डमा रेस पूरा गरेका थिए।

यस्तै, बेलायतका अलिस्टेयर मेस्सनले २८ घन्टा २८ मिनेट ३५ सेकेन्डमा रेस पूरा गर्दै दोस्रो भए।  ३३ घन्टा ५७ मिनेट ४० सेकेन्डमा रेस पूरा गरेका विजय मगर तेस्रो भए।

सय किलोमिटर रेस १४ घन्टा ४५ मिनेट २० सेकेन्डमा पार गर्दै पुरुषतर्फ मनकुमार रोकामगर प्रथम भए। यस्तै, १६ घन्टा ४६ मिनेट ४८ सेकेन्डमा रेस पूरा गरेर फुर्पासिंह तामाङ दोस्रो र १६ घन्टा ५४ मिनेट १७ सेकेन्डमा रेस पूरा गरेर अविनाश देवकोटा तेस्रो भए।

५० किलोमिटर रेस ७ घन्टा १७ मिनेट २५ सेकेन्डमा पार गर्दै पुरुषतर्फ हरिलाल सिंह र महिलातर्फ ८ घन्टा २२ मिनेट ५ सेकेन्डमा पार गर्दै प्रिया राई प्रथम भए। 

यस रेसमा पुरुषतर्फ निम्साङ लिम्बु र महिलातर्फ रसिला तामाङ क्रमशः ७ घन्टा १८ मिनेट ११ सेकेन्डमा र ९ घन्टा १३ मिनेट ६ सेकेन्डमा रेस पूरा गरेर दोस्रो भएका छन्। 

यस्तै, पुरुषतर्फ दीपेश तामाङ र महिलातर्फ छोकी शेर्पाले क्रमशः ८ घन्टा ४ मिनेट ३६ सेकेन्डमा र ९ घन्टा १६ मिनेट ४५ सेकेन्डमा रेस पूरा गरेर तेस्रो भए।

यस संस्करणमा १०० माइल, १०० किमी र ५० किमीका खेलको पाँचौँ स्थानभित्र आउने खेलाडी स्वतः एशिया ट्रेल मास्टर्समा क्वालिफाइ भएको मञ्जुश्री ट्रेल रेसका अध्यक्ष सुवाश थापाले जानकारी दिए। उनका अनुसार यी धावकहरूले मलेसियामा आगामी सेप्टेम्बर १४ मा हुने एटीएम फाइनल रेसमा प्रतिस्पर्धा गर्नेछन्।

त्यस्तै, ३० किलोमिटर रेस ४ घन्टा ४९ मिनेट ४८ सेकेन्डमा पार गर्दै उबिन मल्ल विजेता बने। ४ घन्टा ५७ मिनेट २९ सेकेन्डमा रेस पूरा गरेर लुकास सेर्डन दोस्रो हुँदा  ४ घन्टा ५७ मिनेट ४५ सेकेन्डमा रेस पूरा गरेका एन्ड्रियु एलकक तेस्रो भए। 

३० किलोमिटर महिलातर्फ अमेरिकाकी कार्ली एण्ड्रेसन राट्लीले ६ घन्टा ४५ मिनेट २१ सेकेन्डमा रेस पूरा गर्दै विजेता बनिन्।

बेलायतकी जेन्नी च्याप्लिनले ७ घन्टा १९ मिनेट ४८ सेकेन्डमा ३० किमी रेस पूरा गरेर उपविजेता बन्दा अमेरिकाकी एरिका मिक्सले ७ घन्टा २० मिनेट ५० सेकेन्डमा दौड पूरा गरेर तेस्रो बनिन्।

१० किलोमिटर रेस एक घन्टा २ मिनेट ५ सेकेन्डमा पार गर्दै कुलबहादुर बस्नेत प्रथम भए। एक घन्टा २ मिनेट ६ सेकेन्डमा रेस पूरा गरेर रेम बुढामगर दोस्रो भए। एक घन्टा २ मिनेट ८ सेकेन्डमा रेस पूरा गरेर प्रवीण लिम्बु तेस्रो भए।