नेपाल ‘ए’ र आयरल्यान्ड उल्भ्सबीचको खेल रद्द

काठमाडौँ। नेपाल ‘ए’ र आयरल्यान्ड उल्भ्सबीचको तीन टी–२० शृंखलाअन्तर्गत पहिलो खेल वर्षको कारण रद्द भएको छ।

कीर्तिपुरस्थित त्रिवि क्रिकेट मैदानमा हुने तय भएको खेल दिउँसो १ बजेबाट शुरू हुने थियो। तर, बुधबारदेखिको वर्षाको कारण खेल टससमेत नभइ रद्द भएको नेपाल क्रिकेट संघ (क्यान)ले जनाएको छ। 

‘नेपाल ‘ए’ र आयरल्यान्ड उल्भ्सबीचको पहिलो टी–२० खेल आउटफिल्ड भिजेको कारण रद्द भएको छ,’ क्यानले भनेको छ।

भ्रमणमा रहेको आयरल्यान्ड उल्भ्सले यसअघि सिनियर टोलीसँग दुई खेलको टी–२० शृंखला खेलेको थियो।

कमजोर प्रदर्शन गरेको आयरल्यान्ड उल्भ्स पहिलो खेलमा ६ विकेटले पराजित भएको थियो। यस्तै, दोस्रो खेलमा पनि नेपालले दबदबा कायम राख्दै ७१ रनको जित हासिल गरेर शृंखला २–० ले आफ्नो पक्षमा बनाएको थियो।

नेपाल ‘ए’ र आयरल्यान्ड उल्भ्ससँग दोस्रो खेल शुक्रबार खेल्ने छ।