काठमाडौं । पाहुना टोली अफगानिस्तानले तेस्रो टी-ट्वान्टीमा घरेलु टोली आयरल्याण्डलाई पराजित गरेको छ ।
बेलफास्टमा शुक्रबार राति भएको खेलमा पाहुना टोली २२ रनले विजयी भएको हो ।
जितसँगै ५ खेलको टी-ट्वान्टी सिरिज पाहुना टोलीले २-१ मा पुर्याएको छ ।
अफगानिस्तानले दिएको दिएको १ सय ९० रनको लक्ष्य पछ्याएको घरेलु टोलीले २० ओभरमा ९ विकेट गुमाएर १ सय ६७ रन मात्र बनाउन सक्यो ।
उसका लागि जर्जी ड्याकरोलले अविजित रहदै ५८ रनको अर्धशतकीय ईनिङ खेले । फियोन ह्यान्डले ३६ तथा लुर्केन टुर्केर ३१ रन बनाए ।
पाहुना टोलीका लागि नविन उल हकले ३ तथा मुजिब उर रहमान र फजलहक फारोकीले समान २/२ विकेट लिए ।
त्यसअघि पहिले ब्याटिङ गरेको भ्रमणकारी टोलीले २० ओभरमा ५ विकेट गुमाएर १ सय ८९ रन बनाएको थियो ।
उसका लागि रहमानउल्लाह गुर्बाजले अविजित ५३ रनको अर्धशतकीय पारी खेले । नजिबुल्लाह जाड्रनले ४२ तथा हर्जतुल्लाह जाजईले ३९ रन बनाए । ईब्राहिम जाड्रनले ३६ रन बनाए ।
आयरल्याण्डका लागि जोस लिटिलले २ तथा मार्क अडिर र फियो ह्यान्डले समान १/१ विकेट लिए ।
दुई टोलीबीचको चौथो टी-ट्वान्टी सोमबार हुनेछ ।
