'युवा टोलीबाट नतिजाको अपेक्षा छ'

काठमाडौं । नेपाली यू-२० राष्ट्रिय फुटबल टोलीले आउने तीन महिना भित्र दुई ठुला प्रतियोगिता खेल्दैछ ।

नेपालको युवा टोलीले भारतमा आयोजना हुने साफ यू-२० च्याम्पियनसिप र बहराइनमा आयोजना हुने एएफसी यू-२० एसियन कप छनोट खेल्नेछ ।

दुई प्रतियोगिताका लागि नेपाली टोलीले तयारीलाई तिब्रता दिएको छ । अनुभवी प्रशिक्षक मेघराज केसीले टोलीको नेतृत्व गरिरहेका छन् ।

अखिल नेपाल फुटबल संघ (एन्फा) ले आयोजना गरेको छनोटबाट मुख्य प्रशिक्षक केसीले पहिलो चरणको बन्द प्रशिक्षणमा ४० खेलाडीलाई बोलाएका थिए ।

यतिबेला यू-२० टोलीमा ३० खेलाडी बन्द प्रशिक्षणमा रहेका छन् । यहिँ ३० खेलाडीबाट साफ यू-२० र एएफसी यू-२० एसियन कप छनोट खेल्ने नेपाली टोलीको घोषणा गरिनेछ ।

कोभिड-१९ को महामारीको कारण एन्फा एकेडेमीमा खेलाडी नहुँदा यस पटक युवा  खेलाडी छनोटमा सकस रह्यो । तर, जति खेलाडी छनोट भएर टोलीमा आए सबै क्षमतावान छन् । त्यसैले मुख्य प्रशिक्षक केसी टोलीबाट खुशी छन् ।

'विगत लामो समयबाट कोरोनाका कारण खेलाडी उत्पादनको बाटो रोकिदा खुला रुपमा छनोट गर्नु पर्यो । ५/६ वर्ष अघिको जस्तो अवस्था अहिले छैन । १०० जना जति बच्चाहरु आएकामा १० दिन लगाएर हामीले ४० जनाको छनोट गर्यौ,' प्रशिक्षक केसी भन्छन्, 'मान्छेहरुले सोचिरहेका थिए । कस्तो टिम आउने हो भनेर तर जुन टिम आयो म यसमा खुसी नै रहेको छु ।'

मुख्य प्रशिक्षक केसीले राष्ट्रिय टोलीबाट खेलिसकेका खेलाडी र नयाँ खेलाडीको मिश्रणले नेपाली टोली मजबुत बनेको बताउछन् । उनले यस टोलीबाट नतिजाको आशा गरेको बताए ।

'हाम्रो टिमले जुन मजबुत टोली बनाएका छौँ । यसबाट पूरा नतिजाको अपेक्षा रहेको छ,' प्रशिक्षक केसीले भने ।

साफ यू-२० च्याम्पियनसिपमा आयोजक भारत, नेपाल, माल्दिभ्स, श्रीलंका र बंगलादेशको सहभागिता रहेको छ ।

च्याम्पियनसिपको उद्घाटन खेलमा नेपालले माल्दिभ्सको सामना गर्नेछ। भुवनेश्वरस्थित कालिङ्गा स्टेडियममा हुने उद्घाटन खेल जुलाई २५ मा हुनेछ ।

नेपालले दोस्रो खेलमा श्रीलंकासँग जुलाई २७ मा खेल्नेछ ।  त्यस्तै भारतसँग जुलाई ३१ र अन्तिम खेल बंगलादेशसँग अगस्ट २ मा खेल्नेछ । शीर्ष दुई टोलीले उपाधिका लागि अगस्ट ५ मा प्रतिस्पर्धा छ ।

त्यस्तै एएफसी यू-२० छनोटमा नेपाल समूह 'बी' मा रहेको छ । नेपालको समूहमा कतार, बहराइन, भुटान र बंगालादेश छन् ।

समूह चरणको खेल सेप्टेम्बर १० देखि १८ सम्म हुनेछ । नेपालले भुटानसँग सेप्टेम्बर १० मा खेल्दा १२ सेप्टेम्बरमा कतारसँग खेल्नेछ ।

नेपालले बहराइनसँग सेप्टेम्बर १४ र बंगलादेशसँग अन्तिम खेल सेप्टेम्बर १८ मा खेल्नेछ ।

समूह विजेताले २०२३ मा उज्वेकिस्तानमा आयोजना हुने यू-२० एसियन कपमा स्थान बनाउने छन् ।

प्रशिक्षक केसीका अनुसार खुला छनोटको कारण खेलाडीमा मेहेनत बढेको छ । जसले नतिजामा सकारात्मक प्रभाव पार्ने उनको भनाईछ ।

'अब फुटबलमा लाग्न चाहनेका लागि म सधै फुटबलमा लागि रहे भने टिममा पर्ने रहेछु भन्ने सन्देश गएको छ । खुला छनोटका कारण खेलाडीमा मेहेनत बढेको छ । यसले गर्दा नतिजामा सकारात्मक प्रभाव पर्नेछ,' प्रशिक्षक केसीले भने।

प्रशिक्षक केसीले नेपाली टोलीको सबै पक्ष बलियो रहेको बताए  । पछिल्लो समय टिममा टिम भावना बढेको समेत बताए ।