काठमाडौं । नेपाली राष्ट्रिय क्रिकेट टोली अहिले अमेरिका भ्रमणमा रहेको छ ।
आईसीसी विश्वकप लिग-२ त्रिकोणात्मक एकदिवसीय सिरिज अन्तर्गत आज नेपालले ओमानसँग खेल्दैछ ।
खेल नेपाली समय अनुसार राति ९:१५ मा ह्युस्टस्थित मुसा क्रिकेट स्टेडियममा सुरु हुनेछ ।
लिग तालिकाको शीर्ष स्थानमा रहेको ओमान नेपालको चिरपरिचित प्रतिद्वन्दी हो । अँझ भनौं पछिल्लो समय नेपालको लागि ओमान हरेक सिरिजमा ठुलो चुनौती बनिरहेको छ ।
लिगमा रहेका सात टोलीमध्ये सबै भन्दा कम खेल खेलेको नेपाल १२ खेलमा ६ मा जित र ६ मा हारका साथ छैटौं स्थानमा छ ।
नेपालको आगामी वर्ष हुने एकदिवसीय विश्वकप छनोट खेल्ने योजना पछिल्लो समय त्यति सोचेअनुरुप गईरहेको छैन ।
महत्वपुर्ण र एकदम निर्णायक मानिएका मोडमा नेपाल चुक्दै आइरहेको छ । त्यसैले आज अमेरिकाको धर्तीमा नेपाल उत्रिँदा उसलाई जित्नै पर्ने दबाब छ ।
ओमान हालसम्म ३२ खेलमा १९ मा जित र १२ मा हारका साथ शीर्ष स्थानमा कायमै छ । पछिल्लो खेलमा घरेलु टोली अमेरिकाविरुद्ध व्यहोरेको हारले उसलाई केहि झस्काएको छ । त्यसैले नेपाल थप सजक रहनुपर्ने छ । नेपाललाई शीर्ष तीनमा रहँदै एसोसियट राष्ट्रमा कमाएको सान जोगाई राख्नु बाध्यता छ ।
अभ्यास खेलहरुमा बलियो टिमविरुद्ध जित्न नसकेको पीडाले नेपाल केहि तर्सिएको बेलामा टिमको समीकरणनै बिग्रिनेगरि एकपछि अर्को झट्का पनि सहिरहेको छ ।
नेपालले आफ्ना प्रमुख र भरपर्दा २ जना युवा ओपनर कुशल भुर्तेल र आशिफ सेखलाई चोटको कारणले गुमाइसक्यो । यसको भर्पाईको निमित्त प्रशिक्षक पुबुदु दसानायाकेले आफ्ना पुराना हतियार सुवास खकुरेललाई अमेरिका बोलाए ।
सुवासले प्रतिस्पर्धात्मक अन्तराष्ट्रिय क्रिकेटमा नियमित नखेलेपनि टोलीसंगै प्रशिक्षणमा सामेल भने हुने गरेका छन् । उनी सन् २०१७ पछि राष्ट्रिय टोलीमा फर्केका छन् आकस्मिक रुपमा । उनको अनुभवको नेपालले फाइदा उठाउनु पर्छ साथै सुवास पनि आफ्नो पुनरागमनको बलियो सन्देश दिन लालायित छन् ।
मध्येक्रममा देव खनाल, दिपेन्द्र सिंह ऐरी, रोहित पौडेल, बिनोद भण्डारी, आरिफ सेख लगायतका टेक्निकल र सुन्दर ब्याटिङमा निपुण ब्याटरहरुले राम्रो सुरुवात पाएको खण्डमा नेपालको ब्याटिङ चिन्ता निकै कम हुनेछ ।
रोहितले पछिल्लो अभ्यास खेलमा सानदार शतक प्रहार गरेर आफ्नो लय देखाइसकेका छन् । तल्लोक्रममा करण केसी, आदील अन्सारी,बिक्रम सोब जस्ता खेलाडीले सबैकुरा सहि चल्यो भने ओमानी बलरहरुको दिन खराब बनाउने सामर्थ्य राख्छन् ।
बलिङ नेपालको प्रमुख बिभाग हो । नेपालको बलिङ उच्च स्तरको मानिन्छ । सन्दीप लामिछाने, सोमपाल कामी, करण केसी, किशोर महतो, सुसन भारी, सागर ढकाललाई ओमानको बलियो ब्याटिङ रोक्नु पर्ने चुनौती छ ।
बिशेष गरि जतिन्दर सिंह, बिलाल खान, जिशन मक्सुद जस्ता अनुभवी खेलाडीहरु नेपालको लागि सधैँ टाउको दुखाइ बन्दै आईरहेका छन् । बिलाल खान, खबर अलिको घातक बलिङबाट नेपाली ब्याटर बच्नुपर्नेछ ।
'हामीले आफ्नो उत्कृष्ट क्रिकेट खेल्नुपर्छ र यदि हामीले आफ्नो उत्कृष्ट खेल्यौं भने म विश्वस्त छु कि हामीले यो टुरका सबै खेल जित्नेछौं र जित्ने कीर्तिमानमा सुधार गर्नेछौं,' नेपालका प्रशिक्षक पुबुदु खेल अघि ढुक्क छन् ।
'म हाम्रो एकदिवसीयस्थितिको बारेमा चिन्तित छैन किनकि हामी यसलाई कायम राख्न सक्छौं । तर, सही दिशामा अघि बढ्नु र शीर्ष तीन स्थान सुरक्षित गर्नु अहिलेको प्रमुख विषय हो,' पुबुदु आशावादी देखिए ।
सन् २०१६ देखि २०१९ सम्म अमेरिकी टोलीको प्रशिक्षक रहेको कारण यहाँको अवस्थासँग उनी परिचित छन् त्यसैले नेपालले राम्रो गर्नेमा बिश्वास गर्न सकिन्छ ।
ओमान भर्सेस नेपाल- हेड टु हेड :
नेपाल र ओमानबीच एकदिवसीय अन्तराष्ट्रियमा हालसम्म चार खेल भएको छ । जसमा ओमान नेपालमाथि हाबी देखिन्छ । ओमानले एकदिवसीय खेलमा तीन खेल जितेको छ भने नेपाल मात्र एक खेलमा विजयी भएको छ ।
पिच रिपोर्ट :
यस अघिको खेल हेर्दा क्रिकेट मैदानको पिचले ब्याट्सम्यान र बलर दुवैलाई धेरै ग्रिप दिनेछ । ब्याट्सम्यानहरूले पिचमा राम्रो औसत स्कोर बनाएका छन् । यद्दपि बलरहरूलाई नियमित विकेट लिन अलि गाह्रो हुनेछ ।
ओमान भर्सेस नेपाल अन्तिम नतिजा :
खेल्ने शैली र खेल तथ्याङ्कलाई ध्यानमा राख्ने हो भने प्रतियोगितामा जित हासिल गर्ने टोली ओमान हो तर नेपाल ओमानको तुलनामा धेरै जित्ने पर्ने दबाबमा छ । पुवुदुको यहाँको कन्डिसनसँगको इतिहासलाई हेर्दा एउटा जितको फ्याक्टर हुन सक्छ । त्यसैले नेपाल आफ्नो उत्कृष्ट खेल मार्फत जित हासिल गर्न सक्छ । ( खेलपाटी अनुमान )
