पब्लिक युथलाई उपाधि

काठमाडौं । आयोजक पब्लिक युथ क्याम्पसले लगातार तेश्रो पटक टियु बिबिए कप क्रिकेट प्रतियोगिताको उपाधि जितेको छ ।

काठमाडौंस्थित मुलपानी क्रिकेट मैदानमा शुक्रबार भएको फाइनलमा पब्लिक युथले कान्तिपुर कलेज अफ म्यानेजमेन्ट एण्ड इन्फर्मेसन टेक्नोलोजीलाई ( केसीएमआईटि )  १२ रनले पराजित गर्यो ।

पब्लिक युथले दिएको १५० रनको लक्ष्य पछ्याउने क्रममा केसीएमआईटिले पुरै २० ओभर ब्याटिङ गरेपनि ८ विकेट क्षतिमा १३७ रन मात्र बनायो।

केसीएमआईटिका सुबास सापकोटाले सर्वाधिक ५३ रन तथा अमित अमित मरहट्टाले ३१ रन बनाए। पब्लिक युथका बलर दिवश भट्टराई र सुशान्त सिंहले २/२ विकेट तथा रबिन साउद र सुबोध लामिछानेले १/१ विकेट लिए। 

यस अघि टस जितेर ब्याटिङ गरेको पब्लिक युथ क्याम्पसले २० ओभरमा ४ विकेट क्षतिमा १४९ रन बनाएको थियो।

पब्लिक युथको लागि रबिन साउदले सर्वाधिक ६२ रन बनाए जुन क्रममा उनले ३९ बलमा ४ चौका र ४ छक्का प्रहार गरे। यस्तै इर्शाद अलिले २२, निरञ्जन ढकालले १७ तथा सुनिल थापाले १५ रन बनाए। केसीएमआईटिका बलर सक्षम उप्रेती, सुबाश सापकोटा र सवन भण्डारीले १/१ विकेट लिए।

प्रतियोगिताको उत्कृष्ट खेलाडी पब्लिक युथका रबिन साउद घोषित भए। यस्तै उत्कृष्ट बलर पब्लिक युथका दिवस भट्टराई र ब्याट्सम्यान सुशान्त सिंह घोषित भए।

उपाधिसंगै पब्लिक युथ क्याम्पसले ८५ हजार रुपैयाँ तथा उपविजेता केसीएमआईटिले ३५ हजार रुपैयाँ प्राप्त गर्यो। विजेता खेलाडीहरुलाई नेपाल क्रिकेट संघ ( क्यान ) का कोषाध्यक्ष रोशन कुमार सिंहले पुरस्कार वितरण गरे ।

म्यान क्यान डुले आयोजना गरेको प्रतियोगितामा त्रिभुवन विश्वविधालयका १८ क्याम्पस सहभागी थिए।