काठमाडौं । डिफेन्डिङ च्याम्पियन नेपाल एपीएफ क्लबले ललितपुर मेयर महिला टी–ट्वान्टी च्याम्पियनशीपको उपाधि जितेको छ ।
सोमबार टियु क्रिकेट मैदानमा भएको फाइनलमा सुदुरपश्चिम प्रदेशलाई ८ विकेटले पराजित गर्दै एपीएफले लगातार दोस्रो पटक उपाधि जितेको हो ।
यस अघिको संस्करणमा पनि एपीएफले सुदुरपश्चिमलाई नै पराजित गर्दै उपाधि जितेको थियो ।
उपाधिसँगै एपीएफले २ लाख प्राप्त गरेको छ । सुदुरपश्चिमले १ लाख प्राप्त गर्यो ।
सोमबारको खेलमा १ सय १४ रनको लक्ष्य एपीएफले १५ दशमलब ५ ओभरमा मात्र २ विकेट गुमाएर पूरा गर्यो ।
एपीएफलाई उपाधि दिलाउन ज्योती पाण्डेले सर्वाधिक ४३ रनको योगदान गरिन् । ४४ बल खेलेकी ज्योतीले ५ चौका प्रहार गरिन् ।
इन्दु वर्माले अविजित रहदै २४ बलमा २९ रन जोडिन् । इन्दुले दुई चौका र एक छक्का प्रहार गरिन् ।
कप्तान सिता राना मगर १९ रनमा आउट भईन् ।
सुदुरपश्चिमका लागि लक्ष्मी साउद र सम्झना खड्काले एक–एक विकेट हात पारे ।
यस अघि टस जितेर पहिले ब्याटिङ गर्दै सुदुरपश्चिमले निर्धारित २० ओभरमा ४ विकेट गुमाएर १ सय १३ रन जोड्न सक्यो ।
सुदुरपश्चिमका लागि विन्दु रावलले सर्वाधिक ३७ रनको योगदान गरिन् । विन्दुले ३६ बलमा ५ चौका प्रहार गरिन् ।
डोली भट्टले ३६ रन जोडिन् । डोलीले २५ बलको सामना गर्दा ४ चौका र १ छक्का प्रहार गरिन् ।
कविता कुँवर २४ रनमा अविजित रहिन् ।
रेवती धामी १० रनमा आउट भईन् ।
रितु कनौजिया २ रनमा अविजित रहिन् ।
एपीएफका लागि सुस्मा श्रेष्ठ २ विकेट हात पारिन् ।
-1738250810.jpeg)
