काठमाडौं । नेपाली लेग स्पिनर सन्दीप लामिछाने आबद्द होबार्ट हरिकेन्सले बिग बास लिग (बीबीएल) टी-ट्वान्टी क्रिकेटमा हार व्यहोरेको छ ।
सोमबार भएको खेलमा होबार्ट पर्थ स्कोचर्ससँग ४२ रनले पराजित भएको हो ।
पर्थले दिएको १ सय ६८ रनको लक्ष्य पछ्याएको होबार्टले २० ओभरमा ९ विकेट गुमाएर १ सय २५ रन मात्र बनाउन सक्यो ।
होबार्टका विल पार्करले सर्वाधिक २५ रन जोड्दा नाथन एलिसले २० रन बनाए । कप्तान म्याथ्यु वेड,कालेब जेवेल र डी'आर्ची सर्टले समान १३/१३ रन बनाए । सन्दीप ८ रनमा अविजित रहे ।
पर्थका एन्ड्रयु टेले ३ तथा पिटर हाट्जोग्लु र एस्टन अगरले २/२ विकेट लिए ।
यस अघि पहिले ब्याटिङ गरेको पर्थले २० ओभरमा ७ विकेट गुमाएर १ सय ६७ रन बनाएको थियो ।
पर्थका कुर्टिस पाटर्सनले ७८ रनको अर्धशतकीय इनिङ्स खेले । एस्टन अगरले अविजित ३० रन जोड्दा मिचेल मार्शले २० रन बनाए ।
होबार्टका जोर्डन थोम्पसनले ३ तथा टमरोजेर्सले २ विकेट लिए ।
सन्दीप विकेट विहीन भए । सन्दीपले ४ ओभर बलिङ गर्दै ३९ रन खर्चिए ।
यस हारसँगै होबार्ट ४ खेलमा ६ अंक जोडेर छैटौं स्थानमा रहेको छ ।
पर्थ १४ अंक जोडेर शीर्ष स्थानमा रहेको छ ।
