कप्तान चयन भएपछि सम्मानित भए–लामिछाने 

काठमाडौं । लेग स्पीनर सन्दीप लामिछानेले नेपाली राष्ट्रिय क्रिकेट टिमको कप्तान चयन भएपछि आफू सम्मानित भएको बताएका छन् ।

सामाजिक सञ्जाल फेसबुकमार्फत लामिछानेले नेपाली क्रिकेट टिमको नेतृत्व गर्ने अवसर पाएकोमा आफू सम्मानित भएको बताएका हुन् ।

नेपाल क्रिकेट संघ (क्यान)ले मंसिर २९ गते ज्ञानेन्द्र मल्ललाई कारवाही गर्नुका साथै कप्तान पद खोसेर लामिछानेलाई कप्तानमा नियुक्त गरेको थियो । 

‘छातीमा नेपालको झण्डा बोक्ने मेरो सपना सधै थियो र अब नेपाल क्रिकेट टोलीको नेतृत्व गर्ने अवसर प्राप्त गरेकोमा सम्मानित भएको छु,’ लामिछानेले लेखेका छन् ।

लामिछानेले आफू क्यान, नेपाली जनता तथा विश्वभरीका समर्थकहरुको निस्वार्थ समर्थन तथा प्रार्थनाका लागि कृतज्ञ भएको समेत उल्लेख गरे । 

‘एउटा टिमको रुपमा हाम्रो योजना सरल रहनेछः नेपाललाई क्रिकेट विश्वको नक्सामा प्रभावकारी रुपमा राख्ने । यस्तो हुनका लागि हामी एक परिवार, एक टोली, एक इकाईको रुपमा खेल्नेछौ । यस टिमको ढोका सबैका लागि खुल्ला रहनेछ,’ उनले थपेका छन् ।

लामिछानेले सबै एसोसियट राष्ट्रले सहयोग गर्दै आएको तथा क्यान र अन्तर्राष्ट्रिय क्रिकेट परिषद् (आईसीसी)सँग छलफल गरी टेष्ट राष्ट्रहरुसँग क्रिकेट खेल्न पहल गर्नुपर्ने बताए ।

‘हामीले धेरै कामहरु गर्नुपर्नेछ र हामी सँगै जे पनि हासिल गर्न सक्छौ,’ उनले उल्लेख गरे ।