आर्सनललाई खराब समाचार, लुकाकु फर्कदैछन्

काठमाडौं । आर्सनलले इंग्लिस प्रिमियर लिगमा खराब सुरुआत लिएको छ र यो लन्डन क्लबलाई अझ ठूलो धक्का दिने क्रममा छन्, रोमेलु लुकाकु ।

आइतबार चेल्सीले आर्सनलको सामना गर्नेछ र त्यसमा लुकाकुले फेरि एकपल्ट डेब्यु गर्नेछन् । लिभरपुल र म्यानचेस्टर युनाइटेड पनि आफ्नो सुखद सुरुआतलाई कायम राख्ने प्रयासमा हुनेछ ।

लुकाकु सात वर्षपछि फेरि चेल्सी फर्केका हुन् र यसपल्ट उनलाई तिर्नु परेको मूल्य हो, १३ करोड ३० लाख डलर । उनकै उत्कृष्ट प्रदर्शनले त हो, इन्टर मिलानले पछिल्लो सिजन इटालीको सिरी ए जितेको । चेल्सीलाई अब के विश्वास छ भने यिनै लुकाकुको मदतले क्लबले फेरि एकपल्ट लिग जित्न सक्नेछ ।

यता आर्सनल व्यवस्थापक मिखेल आर्टेटा भने एक प्रकारले दबाबमा छन् र यसका कारण हो, आफ्नो पहिलो खेलमै ब्रेन्टफोर्डसँग पराजित हुनु । चेल्सी पछि आर्सनलले म्यानचेस्टर सिटीको सामना गर्नेछ । यस्तोमा डर के भएको छ भने सेप्टेम्बरको इन्टरेसनल ब्रेक अगाडि कतै आर्सनल अंकविहीन रहने त होइन ?

टोटनहमविरुद्धको पहिलो खेलमा हार बेहोरेको डिफेन्डिङ च्याम्पियन सिटीले भने आज शनिबार नरविचको सामना गर्दैछ । आजै लिभरपुलले बर्नलीको आथित्य गर्नेछ । भर्जिल भान डाइक चोटमुक्त भएर मैदानमा फर्केपछि लिभरपुल बलियो देखिएको छ र उसले पछिल्लो साता नरविचलाई सजिलै हराएको थियो । म्यानचेस्टरले भने आइतबार साउथह्याम्पटनको भ्रमण गर्नेछ ।

–एएफपीको सहयोगमा ।