सिरी ए : त्रिकोणात्मक भिडन्त

काठमाडौं । युभेन्ट्सले फेरि एकपल्ट इटालीको सिरी ए जित्ने छ, यस्तै विश्वास गरिएको छ । आज शनिबारदेखि सुरु हुने इटालीको माथिल्लो डिभिजनमा यस्तो विश्वास किन पलाएको हो भने डिफेन्डिङ च्याम्पियन इन्टर मिलान समस्यामा छ र यो मुख्यत: आर्थिक समस्या हो । शनिबारको पहिलो खेलमा इन्टरले घरमा जेनोआको स्वागत गर्नेछ ।

युभेन्ट्सले भने आइतबार युडिनेजीको भ्रमण गर्नेछ । विश्वास के पनि छ भने उपाधिको भिडन्त त्रिकोणात्मक हुनेछ र यसमा जोडिने अर्को टिम हो, एसी मिलान । यसपल्टको लिगको सबैभन्दा ठूलो विशेषता हो,  पछिल्लो समय अंक तालिकाको शीर्ष सातमा आउन क्लबमध्ये पाँचमा यसपल्ट भने नयाँ प्रशिक्षकसँगै मैदानमा उत्रदैछ । 

यस्तो किन भन्दा उपाधिका लागि हुने त्रिकोणात्मक भिडन्तका अर्को एउटा पात्र यही हो । तर यसको अर्थ अन्य कुनै क्लबको सम्भावना नै छैन् भन्ने पनि होइन् । प्रत्येक सिजन प्रत्येक लिगमा कुनै न कुनै आश्चर्यजनक टिम हुने गर्छ र जसले सबै विश्वासलाई तोड्ने गर्छ । हामीले यसबारे पनि चर्चा गर्नेछौं ।

समाचार संस्था एपीको मदतले तयार पारिएको आलेख ।

इन्टर मिलान

गत सिजन इन्टर मिलानले उपाधि जितेको खुसीयाली पनि बनाउन पाएको थिएन्, ती चाँडै खराव समाचारमा परिणत भए । क्लब र प्रशिक्षकबीचको आपसी सहमतीको आधारमा एन्टोनियो कोन्टेले छाडे । भनिन्छ, यी प्रशिक्षक इन्टरमा खुसी थिएनन्, किनभने उनी आफ्नो योजनालाई अगाडि बढाउन सक्ने स्थितिमा पनि थिएनन् ।

त्यसैले त इन्टरले आफ्ना दुई प्रमुख खेलाडीलाई बेच्नु परेको थियो, रोमेलु लुकाकु र अचरफ हाकिमी । लुकाकुले त पछिल्लो सिजन ३० भन्दा बढी गोल गरेका थिए । त्यसैले भन्न के सम्म सुरु भएको छ भने इन्टरले उपाधि रक्षा गर्न सक्ने मात्र होइन, शीर्ष चारमा प्रवेश पाउन पनि गाह्रो हुनेछ, त्यो भनेको उसले अर्को सिजन च्याम्पियन्स लिगमा खेल्नेमा शंका छ ।

युभेन्ट्स

क्लबले वर्खास्त गरेको दुई वर्ष पनि भएको छैन्, तर मासिमिलिनो एलेग्री फेरि युभेन्ट्सको प्रशिक्षकमा नियुक्त भएका छन् । यी यस्ता उम्दा प्रशिक्षकले हुन्, जसले युभेन्ट्सलाई लगातार पाँच सिरी ए उपाधि दिलाए । त्यसमा चार पल्ट त क्लबले लिग र कप दुवै जितेको थियो । अनि दुई अवसरमा टिम च्याम्पियन्स लिगको फाइनल पनि पुगेको थियो ।

यी ५४ वर्षीय प्रशिक्षकको आगमनको अर्थ नै हो, युभेन्ट्सले फेरि लिग जित्न भन्ने दाबी गर्न मिल्ने । गत सिजन युभेन्ट्सले प्रशिक्षक आन्द्रे पिर्लोको नेतृत्वमा खेलेको थियो र केही पनि जित्न सकेन् । यसरी टिमले लगातार नौ पल्ट लिग जितेको क्रममा पूर्ण विराम लागेको थियो । धन्न क्लब चौथो स्थानमा रह्यो । यसपल्ट पनि युभेन्ट्समा क्रिस्टियानो रोनाल्डो रहने छन् नै ।

एसी मिलान

गत सिजन अधिकांस समय मिलान उपाधिका लागि बलियो प्रत्यासी थियो, तर अन्त्यमा उसले आश्चर्यजनक ढंगले त्यसलाई जित्न सकेन् । तर पनि क्लब सन् २०१३–२०१४ यता पहिलो पल्ट युरोपेली च्याम्पियन्स लिगमा फर्कन सफल रह्यो । पछिल्लो सिजनको बलियो सुरुआतका कारण ज्लाटन इब्राहिमोभिच थिए ।

तर उनलाई लागेको चोटसँगै उपाधिको सम्भावना पनि हराएर गएको थियो । अबको अक्टोबरमा उनी ४० वर्षमा हुनेछन् र मिलानको यसपल्टको लिग यात्रा धेरै हदसम्म उनमै निर्भर हुनेछ । मिलानमा यसपल्ट अर्का भेट्रान खेलाडी ओलिभर जिरोड पनि आएका छन् र उनको प्रदर्शनले पनि अर्थ राख्नेछ । मिलानले सोमबार साम्पडोरियाविरुद्ध आफ्नो पहिलो खेल खेल्नेछ ।

अरूको सम्भावना

फेरि एकपल्ट जोसे मोउरिन्हो इटाली फर्केका छन् । एक दशक अगाडि उनले इन्टरलाई एकै सिजन तीन उपाधि दिलाएका थिए । अहिले यी ५८ वर्षीय प्रशिक्षक रोमामा छन् । उनको मुख्य जिम्मेवारी हुनेछ, रोमालाई फेरि एकपल्ट उपाधिको प्रत्यासी बनाउने । गत सिजन रोमा लिगको सातों स्थानमा थियो र यो विजेता इन्टर भन्दा २९ अंकले पछाडिको स्थिति हो ।

सन् २००८ यता रोमाले कुनै उपाधि जित्न सकेको पनि छैन् । लाजियो र नेपोलीले पनि नयाँ प्रशिक्षक पाएका छन्, क्रमश: मउरिजो सारी र लुसियानो स्पालेटी । गत सिजनका शीर्ष सातमध्ये मिलान र एटलान्टाले मात्र प्रशिक्षक फेरेको छैन् । एटलान्टा एउटा बलियो क्लबका रूपमा विकास हुँदैछ र आफूलाई स्थापित गर्ने प्रयासमा हुनेछ ।