एभर्टनको च्याम्पियन्स लिग सपना

एजेन्सी । इंग्लिश प्रिमियर लिग फुटबलमा बिहीबार राती भएको खेलमा एभर्टनले वेस्ट ब्रोमलाई १–० ले पराजित गर्दै अंक तालिकाको पाँचौ स्थानमा उक्लियो ।

पछिल्ला तीन खेलमा लगातार जित निकालेको एभर्टनका प्रशिक्षक कार्लो एन्सेलोटीले अबको लक्ष्य च्याम्पियन्स लिगमा छनोट हुनु रहेको बताए ।

उनले वेस्ट ब्रुमविरुद्धको जितपछि आफ्नो टोलीले च्याम्पियन्स लिगको सपना देखिरहेको बताएका हुन् । तर, उनले आफ्नो टोलीको प्रदर्शनलाई सुधार गर्न आवश्यक रहेको बताए ।

एसी मिलान र रियल मड्रिडलाई च्याम्पियन्स लिग जिताईसकेका उनले भने, ‘सिजनको सुरुवातमा २६ खेल खेल्दा एभर्टन तालिकाको शीर्ष पाँचमा हुनेछ भनेर कसैले भन्न सकेका थिएनन् ।’

उनले थपे, ‘सपना अब च्याम्पियन्स लिग हो । यो सपनाको अनुसरण गर्नु उत्कृष्ट हुनेछ । यो सबैको करियरको एक चरण पनि हो ।’

यतिबेला एभर्टन च्याम्पियन्स लिग क्वालिफाई सपनाको लडाईमा रहेको उनले बताए । त्यसका लागि टोलीले अन्त्यसम्म बलिदान दिनु आवस्यक रहेको उनको भनाई छ । तर, यो युरोपको लडाँई भएकाले टोलीलाई निकैनै दबाब रहेको उनले बताए ।

‘च्याम्पियन्स लिग हाम्रो चरण र लक्ष्य हो । हामीले थोरै कदम चाल्नुपर्दछ । तर, त्यसका लागि त्याग गर्न अझ धेरै कुरा छ,’ उनले भने, ‘यदि मैले अंक तालिकालाई हेरे भने म साँच्चिकै खुसी छु । किनभने स्थिति राम्रो छ तर यो सिजनको अन्त्य होइन र हामीले लडाई गर्नुपर्छ ।’

एभर्टन नौ पटक घरेलु लिग जितेको छ । तर, प्रिमियर लिगमा १९९२–९३ को सिजनपछि एक पटक २००४–०५ मा मात्र लिगको शीर्ष चारमा पुगेको छ ।

तर, त्यस समय पनि एभर्टनले च्याम्पियन्स लिगको समूह चरणमा खेल्न पाएन् ।

२००५–०६ का लागि भएको तेस्रो क्वालिफाइङ चरणमा स्पेनीस क्लब भिल्लारियलसँग समग्रमा ४–२ को पराजित भएपछि एभर्टन च्याम्पियन्स लिगको यात्राबाट बाहिरिएको थियो ।

तर, यस सिजन बाँकी रहेका १२ लिग खेलहरूमा एभर्टनले राम्रो प्रदर्शन गर्न सके च्याम्पियन्स लिग खेल्ने ठूलो मौका छ ।