सातदोबाटोको अपराजित यात्रा कायमै

काठमाडौं । सहिद स्मारक 'बी' डिभिजन लिग फुटबलमा शीर्ष स्थानको सातदोबाटो युथ क्लबले साँघुरो जित निकालेको छ ।

सोमबार भएको खेलमा सातदोबाटोले श्री भगवती क्लबलाई १-० गोल अन्तरले पराजित गरेको हो ।

एन्फा कम्प्लेक्स सातदोबाटोमा सातदोबाटोलाई जित दिलाउन दोर्जे तामाङले निर्णायक गोल गरे ।

खेलको २५ औं मिनेटमा दोर्जेले पेनाल्टीमा गोल गरेका थिए ।

श्री भगवतीका खेलाडीले पेनाल्टी क्षेत्रमा ह्याण्ड गरेपछि सातदोबाटोले पेनाल्टी पाएको थियो ।

यस जितसँगै सातदोबाटोले लिगमा अपराजित यात्रा कायम राखेको छ ।

सातदोबाटोले शीर्ष डिभिजनमा उक्लने मौका समेत बलियो बनाएको छ ।

जितपछि सातदोबाटोले ८ खेलमा २२ अंक जोडेको छ ।

श्री भगवती ८ खेलमा ६ अंक जोडेर नवौं स्थानमा रहेको छ ।

लिगमा १२ क्लबले प्रतिस्पर्धा गरिरहेका छन् ।

एक टिम 'ए' डिभिजन लिगमा बढुवा हुनेछ भने एक टिम 'सी' डिभिजनमा घटुवा हुनेछ ।