काठमाडौं । नेपाली राष्ट्रिय क्रिकेट टोलीका सदस्य सोमपाल कामी आबद्द मराठा अरेबियन्सले आबुधाबी टी-१० लिगमा हार व्यहोरेको छ ।
बिहीबार भएको खेलमा मराठा डेकन ग्लाडियटर्ससँग २९ रनले पराजित भएको हो ।
ग्लाडियटर्सले दिएको १ सय २१ रनको लक्ष्यसहित जवाफी ब्याटिङ गरेको मराठाले १० ओभरमा ३ विकेट गुमाएर ९१ रन मात्र बनाउन सक्यो ।
मराठाका लागि कप्तान मोसाडेक होसेनले सर्वाधिक ४४ रन बनाए । इशान मलोत्राले २२ रन जोडे ।
यस अघि पहिले ब्याटिङ गरेको ग्लाडियटर्सले १० ओभरमा ४ विकेट गुमाएर १ सय २० रन बनाएको थियो ।
ग्लाडियटर्सका लागि अनवर अलिले ३९ रन जोड्दा प्रसान्त गुप्ताले ३५ रन बनाए ।
यासिर कलिमले २८ रन जोडे ।
ग्लाडियटर्सविरुद्ध सोमपालले किफायती बलिङ गरे ।
सोमपालले २ ओभर बलिङ गर्दै १२ रन खर्चिएर दुई विकेट लिए ।
