टोटेनहम शीर्ष तीनमा

एजेन्सी । इंग्लिस प्रिमियर लिग फुटबलमा टोटेनहमले लिड्स युनाईटेडविरुद्ध सहज जित निकालेको छ ।

घरेलु मैदानमा शनिबार राति भएको खेलमा टोटेनहमले लिड्सलाई ३-० गोल अन्तरले पराजित गरेको हो ।

टोटेनहमलाई जित दिलाउन ह्यारी केन, ह्युङ मिन सन र टोबी एल्डरवायर्ल्डले एक-एक गोल गरे ।

पहिलो हाफको २९ औं मिनेटमा केनले पेनाल्टीमा गोल गर्दै टोटेनहमलाई सुरुवाती अग्रता दिलाएका थिए ।

खेलको ४३ औं मिनेटमा सनले गोल गर्दा टोटेनहम पहिलो हाफमा २-० ले अघि रह्यो ।

त्यसपछि खेलको ५० औं मिनेटमा टोबीले गोल गर्दै घरेलु टोलीलाई ३-० को जित दिलाए ।

टोटेनहमको मैदानमा बल पोजिसनमा पकड जमाएपनि लिड्सले गोल भने गर्न सकेन । गोलका लागि केहि अवसर पाएपनि लिड्सका खेलाडी चुकेका थिए ।

यस्तै खेलको अन्तिम केहि समय टोटेनहम १० खेलाडीमा समेटिएको थियो ।

म्याट दोहेर्टीले दोहोरो पहेलो कार्डसहित रातो कार्ड पाउँदा घरेलु टिम १० खेलाडीमा समेटिएको हो ।

घरेलु मैदानको जितसँगै टोटेनहम लिगको तेस्रो स्थानमा उक्लिएको छ ।

टोटेनहमले १६ खेलमा २९ अंक जोडेको छ ।

लिड्स २३ अंक जोडेर ११ औं स्थानमा रहेको छ ।