विमलसहित १४ खेलाडी बाहिरिए

काठमाडौं । विमल घर्ति मगरसहित १४ खेलाडी राष्ट्रिय फुटबल टिमको बन्द प्रशिक्षणबाट बाहिरिएका छन् ।

अखिल नेपाल फुटबल संघ (एन्फा) ले शुक्रबार प्रारम्भिक चरणको बन्द प्रशिक्षणमा रहेका ५८ खेलाडीबाट १४ खेलाडी बाहिरिएको जनाएको छ ।

राष्ट्रिय टिमको कार्यवाहक प्रशिक्षक बाल गोपाल महर्जनले करिब १ महिनाको प्रशिक्षणपछि ५८ खेलाडीबाट घटाएर ४४ खेलाडी छनोट गरेका हुन् ।

बन्द प्रशिक्षणबाट बाहिरिनेमा विमलसहित सुमन अर्याल, देव लिम्बु, रन्दिप पौडेल, अमित तामाङ, जया गुरुङ, नितिन थापा, रजत तिवारी, दिपेश आले मगर, राजेश परियार, प्रिजन तामाङ, रेजिन सुब्बा, राजिब  लोप्चन र विमल राना रहेका छन् ।

लामो समयपछि राष्ट्रिय टिममा परेका फरवार्ड विमल चोटका कारण टिमबाट बाहिरिएका हुन् । उनले प्रशिक्षणको दौरान गम्भीर चोट बोकेका थिए । उनको उपचार कतारमा हुने एन्फाले जनाएको छ ।

यस्तै एन्फाले डिफेन्डर सुमन भने चोट मुक्त भएपछि टिममा फर्कने जनाएको छ ।

फिफा विश्वकप छनोट र एसियन कप छनोट अन्तर्गत बाँकी खेलका लागि एन्फाले प्रारम्भिक चरणको बन्द प्रशिक्षणमा ५८ खेलाडीलाई बोलाएको थियो ।

कतारमा २०२२ मा हुने विश्वकप र चीनमा २०२३ मा एसियन कप छनोटमा नेपालले अब तीन होम खेल खेल्न बाँकी रहेको छ ।

नेपालले अष्ट्रेलिया, जोर्डन र चाईनिज ताइपेसँग खेल्न बाँकी रहेको छ ।