एट्लेटिको छाड्ने कोस्टाको निर्णय

एजेन्सी । स्पेनका फरवार्ड डिएगो कोस्टा एट्लेटिको मड्रिडको बसाई टुङ्गाएका छन् ।

कोस्टाले सम्झौता अघिनै स्पेन बसाई टुङ्गयाउन सहमत बनेका हुन् ।

पछिल्लो सहमतीले कोस्टा प्रिमियर लिग फर्कने सम्भावना देखिएको छ ।

३२ वर्षिया फरवार्डले एट्लेटिकोसंग अर्को समरसम्मका लागि सम्झौता गरेका थिए ।

अक्टोबरको बीचदेखि उनले मात्र तीन खेलमा मैदान उत्रन पाए । ती सबै खेलमा बैकल्पिक खेलाडीको रुपमा उनी मैदान छिरेका छन् ।

‘केही दिन अघि कोस्टाले ब्यक्तिगत कारण देखाउँदै क्लब छाड्न चाहेको बताए । मंगलबार उनले सम्झौता समाप्त गरेका छन् ।’ क्लबले भनेको छ ।

‘क्लबले यस वर्षको दौरान उनले समर्पणका लागि डिएगो कोस्टालाई धन्यवाद दिएको छ । उनको ब्यवसायीक करियरको अघिल्लो चरणका लागि शुभकामना दिएको छ ।’ एट्लेटिकोले भनेको छ ।

लुईस सुआरेज र जोआओ फिलिक्सले यस सिजन एट्लेटिकोको अग्रपङ्ती सम्हालिरहेका छन् ।

आर्सनल र उल्भ्स कोस्टासंग जोडिएका छन् । कोस्टाले तीन सिजन चेल्सीमा बिताउने क्रममा दुई प्रिमियर लिगको उपाधि जितेका छन् ।

कोस्टाले चेल्सीका लागि १ सय २० खेलमा ५९ गोल गरेका छन् । तत्कालिन प्रशिक्षक एन्टोनियो कोन्टेले आफ्नो योजनामा नरहेको जानकारी गराएपछि कोस्टाले क्लब छाडेका थिए ।

सन् २०१७ को सेप्टेम्बरमा उनलाई एटलेटिकोमा बेचिएको थियो । उनले सन् २०१३–१४ मा सर्वाधिक गोल गर्दै क्लबलाई ला लिगा जिताएका थिए ।

यस सिजन ला लिगामा एट्लेटिको शीर्ष स्थानमा छ । गोल अन्तरका आधारमा रियल भन्दा एट्लेटिको अघि छ । एट्लेटिकोले दुई खेल कम खेलेको छ ।