लियोको कीर्तिमान, मिलानको अग्रता कायमै

एजेन्सी । एसी मिलानका राफेल लियोले सिरि ए फुटबलको ईतिहासमै सर्वाधिक छिटो गोलको कीर्तिमान कायम गरेका छन् ।

आईतबार राति सासुलोविरुद्ध खेल सुरु भएको ६ सेकेन्डमै लियोले एसी मिलानका लागि गोल गर्दै कीर्तिमान बनाएका हुन् ।

पोर्चुगलका २१ वर्षिया फरवार्डले हकन काल्होग्लुको पासलाई सदुपयोग गर्दै गोल गरेका थिए ।

उनले पिआचेन्जाका लागि पाओलो पोगीले फ्लोरेन्टिनाविरुद्ध सन् २००१ को डिसेम्बर २००१ मा कायम गरेको ८ दशमलव ९ सेकेन्डको छिटो गोलको कीर्तिमान भंग गरेका हुन् ।
लियो लगत्तै एलेक्सिस सेलेमेकर्सले मिलान क्लबको अग्रता दोब्बर बनाएका थिए । खेल सकिन एक मिनेट अघि घरेलु टोलीका डोमनिको बर्दीले एक गोल फर्काएका थिए ।
जितसंगै मिलान क्लबले शहरी प्रतिद्धन्दी ईन्टरसंग १ अंकको अग्रता लिन सफल भएको छ ।

शीर्ष स्थानको एसी मिलानको ३१ अंक छ । सासुलो २३ अंक सहित छैटौं स्थानमा छ ।

आईतबार रातिनै ईन्टर मिलानले स्पिजियालाई २–१ ले हरायो ।

अचरफ हकिमीले ५२ औं मिनेटमा ईन्टरलाई अघि बढाएका थिए । ७१ औं मिनेटमा रोमेलु लुकाकुले ईन्टरलाई २–० ले अघि बढाए । खेलको ईन्जुरी समयमा रोबर्टो पिकोलीले एक गोल फर्काएका थिए ।

जित सहित ईन्टरले शीर्ष स्थानको एसी मिलानमाथि दबाब बढाएको छ । ईन्टर शीर्ष स्थानको एसी मिलान भन्दा मात्र एक अंक पछि छ । स्पिजिया ११ अंक सहित रेलिगेशन जोन भन्दा एक स्थान माथि छ ।