रेलिगेशनको टोलीसंग लेस्टरको हार

एजेन्सी । प्रिमियर लिग फुटबलमा लेस्टर सिटी रेलिगेशन क्षेत्रमा रहेको फुलहमसंग पराजित भएको छ ।

सोमबार राति घरेलु मैदानमा लेस्टर सिटी फुलहमसंग २–१ ले पराजित बनेको हो ।

पाहुना टोली फुलहमले खेलको ३० औं मिनेटमा एडमोला लुकम्यानको गोलबाट खेलमा अग्रता लिएको थियो । त्यसको ८ मिनेटपछि इभान काभालेरोले पेनाल्टीमा गोल गर्दै फुलहमको अग्रता दोब्बर बनाएका थिए । यसअघि फुलहमले तीन पेनाल्टी खेर फालेको थियो । तर इभानले प्राप्त पेनाल्टीलाई गोलमा बदले ।

खेल सकिन चार मिनेट अघि हार्वे बान्र्सले गोल गरेपनि लेस्टरको हार टार्न भने सकेनन् । लेस्टरले शीर्ष स्थानको टोटेनहमसंग अंक बराबरी गर्ने अवसर गुमाएको छ ।

अघिल्लो खेलमा लेस्टर साविक विजेता लिभरपुलसंग ३–० ले पराजित बनेको थियो ।

फुलहमले सिजनको दोस्रो जित निकालेको छ । र रेलिगेशनको ठाउँबाट माथि उक्लिएको छ । लेस्टर भने शीर्ष स्थानको टोटेनहम भन्दा तीन अंकले पछाडी परेको छ ।

शीर्ष स्थानको टोटेनहमले २१ अंक छ । लेस्टर १८ अंक सहित चौथो स्थानमा छ । फुलहम ७ अंक सहित पुछारबाट चौथोमा छ ।

अर्को खेलमा वेस्ट ह्यामले एन्टन भिल्लालाई पराजित गर्दै तालिकाको शीर्ष ५ मा उक्लियो ।

एन्जेलो ओगबोनाले दोस्रो मिनेटमा गोल गर्दै घरेलु टोली वेस्ट ह्यामलाई अघि बढाएका थिए ।

ज्याक ग्रिलिसले पाहुना टोलीका लागि बराबरी गोल गर्दै एन्टन भिल्लालाई खेलमा फर्काएका थिए ।

दोस्रो हाफको पहिलो मिनेटमै गारोड बावेनले गोल गर्दै घरेलु टोलीका जित सुनिश्चित गरेका थिए ।

जित सहित वेस्ट ह्याम तालिकाको पाँचौ स्थानमा उक्लिएको छ । शीर्ष स्थानको टोटेनहम भन्दा वेस्ट ह्यामको चार अंक कम छ । एन्टन भिल्ला १५ अंक सहित तालिकाको १० औं स्थानमा छ ।