एजेन्सी । अमेलिया केरले बेलिण्डा क्लार्कको बारेमा थाहा पाएकी थिइनन् । अष्ट्रेलियाकि पुर्व कप्तान क्लार्कले १९९७ मा प्रहार गरेको अविजित २ सय २९ रन बारे पनि उनलाई थाहा थिएन ।
सन् २००१ मा जन्मिएकी केरले सो कीर्तिमान २१ वर्षपछि तोड्न सकिन् । सन् २०१८ मा आयरल्याण्डसँगको खेलमा केरले अविजित २ सय ३२ रन बनाईन् ।
यो अहिलेसम्मकै महिला क्रिकेटमा व्यक्तिगत उच्च स्कोर हो । उनी पुरुष–महिला दुवै क्रिकेटमा दोहोरो शतक प्रहार गर्ने सबैभन्दा कान्छी खेलाडी बनेकी थिइन् ।
लेग स्पिन बलिङ अलराउण्डरको भुमिकामा खेल्ने उनले त्यसदिन बलिङमा पनि उल्लेख्य प्रदर्शन गरिन् । केरले बलिङतर्फ १७ रनको खर्चिएर ५ विकेट हात पारेकी थिइन् ।
‘मैले बेलिण्डा क्लार्कको बारेमा पहिले सुनेकी थिइन । मलाई रेकर्डको बारेमा पनि थाहा थिएन । बिचमा रेकर्ड बारे घोषणा गरेको जस्तो सुनेकी थिए, तर मैले बुझेकी थिइन, किनकी सबैले ताली बजाइरहेका थिए । मेरो लागि यो निकै रमाइलो थियो ।’ केरले भनिन् ।
उनको कीर्तिमान तोड्न महिला क्रिकेटरलाई लामो समय लाग्ने देखिन्छ ।
अन्तर्राष्ट्रिय स्तरमा पहिलो पटक ओपनरको रुपमा खेल्दा उनले पूरा ५० ओभरनै ब्याटिङ गरेकी थिइन् ।
‘ओपनिङ गर्न पाउनु मेरा लागि सौभाग्य थियो । यसले गर्दा मैले सुरुबाट खेल्दै गएपछि मध्य ओभरमा पनि खेल्ने मौका मिल्दथ्यो । मैले सुरुमा मेहेनत गरेपछि भने आत्मबल बढ्यो र लेइग (कास्परेक)सँग साझेदारी गर्दै बाउन्ड्री प्रहार गर्न लागे । हाम्रो विकेट नगएकाले झनै ठुला शट खेल्ने साहस आएको थियो ।’ उनले सुनाइन् ।
केर तावा कलेजम पढ्दै क्रिकेट खेल्ने गर्दथिन् । वेलिङ्टनको उत्तरी भेगमा उनले उमेर समुहको खेल खेलेकी थिइन् । उनले न्युजिल्यान्डको टोलीमा भने सन् २०१६ मा डेब्यु गरेकी थिइन् ।
‘तावा निकै सुन्दर ठाउँ हो, निकै उत्कृष्ट समुदाय छ । मेरो रेकर्ड उनिहरुका लागि हो । मलाई विश्वास छ, उनीहरु खुशीयाली मनाउँदै छन् ।’ केरले खेलपछि बताएकी छिन् ।
केरको सो स्कोरले टोलीकी प्रशिक्षक हेइडी टिफेनलाई आफुले गरेको साझेदारी याद दिलाएको थियो । सन् २००९ मा टिफेन र सेझे बेट्सले २ सय ६२ रनको साझेदारी गरेका थिए । त्यो समय न्युजिल्यान्डका खेलाडीले गरेको सबैभन्दा ठूलो साझेदारी थियो ।
कास्परेक र केरको दोश्रो विकेटका लागि २ सय ९५ रनको साझेदारीले टिफेनलाई आफ्नो खेल जिवनको महत्वपूर्ण दिन सम्झाइदिएको थियो ।
‘सेझे र मैले त्यो रेकर्ड गराएका थियौं र हामी केर र कास्परेक जस्ता अद्भुत खेलाडीलाई सो कीर्तिमान तोडेको देख्दा निकै खुशी थियौं ।’ टिफेनले भनिन्, ‘कीर्तिमान भनेकै तोडिनका लागि बन्छन् । यसले हाम्रो टोलीलाई कहाँसम्म पु¥याउन सकिन्छ भन्नेको छनक दिएको थियो । हामी निकै उत्साहित थियौं ।’
‘केर निकै असल छिन् । उनको अनुहारमा सधैं मुस्कान हुन्छ । उनी सदैव टिमका लागि उत्कृष्ट खेल्न चाहाने स्वभावकी छन् ।’ प्रशिक्षक टिफेनले बताइन् ।
केरले आफ्नो ब्याटिङको अन्त्य जसरी गरेकी थिइन्, त्यो पनि हेर्न लायक थियो । अन्तिम ३ बलमा उनले क्लार्कको २ सय २९ रनको कीर्तिमान तोड्ने बेलामा २ चौका र १ छक्का प्रहार गरेकी थिइन् । खेलमा भने उनले २ छक्का र ३१ चौका हिर्काएकी थिइन् ।
‘केरले कीर्तिमान तोड्लिन् कि नाइँ भन्दै मैले मनमै प्रश्न गरिरहेकी थिए । केरलाई सो कीर्तिमान तोड्न एक चौका अथवा एक छक्का आवश्यक थियो । उनलाई कीर्तिमान बारे थाहा थिएन, तर उनले अन्तिम बलमा छक्का प्रहार गर्दै कीर्तिमान तोड्न सकिन् ।’ टिफेनले स्मरण गरिन् ।
सुनमा सुगन्ध छर्नु भने झै उनले आफ्नो यस कीर्तिमानमा अर्को पनि सम्झनालायक क्षण थपिन्, जब उनले ५ विकेट हात पारिन् ।
‘मलाई त्यसदिन बलिङ गर्न पाउँछु जस्तो लागेको थिएन । म थाकेकी हुँदा सुझेले मलाई खेल अवधिभर स्लिपमै राख्छिन् जस्तो लागेको थियो ।’ केरले भनिन्, ‘फिल्डिङमा उत्रनु अगाडी मलाई फिजियोले टेबलमा सुत्न भन्नुभएको थियो र दुई मिनेट थकाइ मारेपछि पुन मैदान उत्रिएकी थिए ।’
‘मैदान उत्रिए पछि मलाई निकै आनन्द आइरहेको थियो । पिच टर्निङ थियो, जसले मलाई फाइदा दिन सक्थ्यो । मैले सुझेसँग बलिङ मागे र बलिङ गर्न पाए ।’ केरले थपिन् ।
अन्तिममा न्युजिल्यान्डले सो सिरिज ‘ह्वाइट्वास’ गरेको थियो । न्युजिल्यान्डले सबै खेलमा ४ सय बढी रन प्रहार गर्दै ३ सय बढीको अन्तरालको जित हात पारेको थियो । दुबै बलिङ अलराउण्डर केर र कास्परेकलाई शीर्ष क्रममा खेलाउने प्रशिक्षकको प्रयोगले सकारात्मक नतिजा दिएको थियो ।
‘मैले केरलाई नजिकबाट चिन्छु । उनीसंग ठूलो स्कोर लगाउने तागत छ । उनी हाम्रो टोलीकै सबैभन्दा उत्कृष्ट अलराउण्डर हुन् । अब उनले टोलीका लागि शीर्ष क्रममै ब्याटिङ गर्ने छिन् ।’ टिफेनले भनिन्, ‘उनको बलिङ झन् उनका लागि फाइदाको विषय हो । १७ वर्षकै उमेरमा उनी निकै उत्कृष्ट छिन् ।’
(क्रिक इन्फाेबाट अनुवाद)
