एजेन्सी । रुसमा जारी फिफा विश्वकप फुटबलमा उरुग्वेले विजयी सुरुवात गरेका छन् । शुक्रबार भएको खेलमा इजिप्टलाई १ - ० ले हराउदै उरुग्वेले विजयी सुरुवात गरेको हो ।
एकाटेरीनवर्गस्थित सेन्ट्रल रंगशालामा उरुग्वेका लागि जोसे मारिया गिमेन्जले निर्णायक गोल गरेका हुन् । गिमेन्जले खेलको ८९ औं मिनेटमा हेड मार्फत गोल गर्दै उरुग्वेलाई महत्वपूर्ण जित दिलाए । इजिप्टविरुद्ध निकै आक्रामक खेल खेलको भएपनि उरुग्वेले थप गोल गर्न सकेनन् । उसका एडिन्सन काभानीको फ्रिकिक पोस्ट बारमा लागेर फर्किएको थियो । यस्तै लुइस स्वारेजले केहि गोलको अवसर खेर फालेका थिए ।
इजिप्टविरुद्धको जितसँगै समूह 'ए' को उरुग्वेले ३ अंक जोडेको छ । यो समूहमा रुसको पनि ३ अंक छ । रुसले बिहिबार साउदी अरेबियालाई ५ - ० ले हराएको थियो ।
