३२ महिनापछि कोमा बाहिर !

एजेन्सी । हृदयघातका कारण अस्पताल भर्ना भएका डच क्लब आयाक्सका मिडफिल्डर अब्देलहक नौरी करिब ३२ महिनापछि घर फर्किएका छन् ।

सन् २०१७ मा हृदयघातको कारण मैदानमै लडेका मिडफिल्डर नौरी २ वर्ष ८ महिना १९ दिनपछि घर फर्किएका हुन् ।

मोरक्को मुलका डच फुटबलर नौरीलाई अष्ट्रियामा जुलाई ८ मा जर्मन क्लब वेडर बर्मेनसँगको मैत्रीपूर्ण खेल दौरान हृदयघात भएको थियो ।

हृदयघातको कारण मैदानमा लडेका २२ वर्षे नौरीलाई मस्तिष्कघात भएको थियो । त्यसयता उनी अस्पतालको कोमामा रहेका थिए ।

नौरीका भाइ अब्डेराहिमले एक टेलिभिजनसँग कुरा गर्दै नौरी कोमाबाट बाहिर निस्किएको र अहिले घरमा रहेको बताए । तर, नौरी पूर्णरुपमा अरुमा निर्भर रहेको समेत उनले बताए ।

'उ ठिक हुँदै गईरहेको छ । सुत्ने, उठ्ने र खाने गर्छन् । तर, उ पूर्ण रुपमा अरुमा निर्भर छन्,' अब्डेराहिमले भनेका छन् ।

यस्तै उनले नौरीले आँखीभौ चलाउने जस्ता कार्य गर्न थालेको समेत बताए ।

नौरीका बुबा मोहम्मदले राम्रो हेरचारको लागि घर ल्याएको बताए ।

'हामीले सबैभन्दा राम्रो हेरचाह गर्नुपर्छ। हामी आफैंले धेरै राम्रो गर्नखोज्दैछौँ,' मोहम्मदले भने।