खेलाडीको ध्यान खेलमा थिएन - प्रशिक्षक एबिङ

काठमाडौं । नेपाली राष्ट्रिय भलिबल टिमका मुख्य प्रशिक्षक हान एबिङले खेलाडीले खेलमा ध्यान दिन नसक्दा माल्दिभ्ससँग पराजित भएको बताएका छन् ।

घरेलु कोर्टमा जारी एभिसी सेन्ट्रल जोन पुरुष भलिबल च्याम्पियनसिप अन्तर्गत समूह चरणको अन्तिम खेलमा माल्दिभ्ससँग पराजित भएपछि डच प्रशिक्षक एबिङले खेलाडीले ध्यान खेल बाहिर केन्द्रित गरेको बताए ।

'खेलाडीहरुको ध्यान खेल बाहिर थियो । जब खेलमा ध्यान केन्द्रित हुँदैन खेल्न सकिँदैन । म निराश छु,' एबिङले खेलपछि भने, 'बेलुकाको मिटिङमा खेलको चर्चा गर्छु । यो कसरी भयो ? हामीसंग २ सेट हार्दा समेत खेलमा फर्कने मौका थियो । हाम्रो खेलाडीले तेस्रो सेटमा लक्ष्य नै परिवर्तन गरे जस्तो लाग्यो । आज यसको चर्चा हुन्छ । अब यस्तो हुनु हुँदैन ।'

लगनखेलस्थित त्रिभुवन आर्मी क्लबको शारीरिक तालिम तथा प्रशिक्षण केन्द्रको कभर्डहलमा बुधबार नेपाल माल्दिभ्ससँग ३-० को सोझो सेटमा पराजित भएको थियो । घरेलु कोर्टमा खराब प्रदर्शन गरेको नेपाललाई माल्दिभ्सले २५-२२, २५-२१ र २५-१४ को सेटमा पराजित गरेको थियो ।

तर, प्रशिक्षक एबिङले माल्दिभ्सविरुद्ध नेपालले सुरुवाती दुई खेल जित्नु पर्ने बताए । तेस्रो सेटमा खेलाडीले खेल्दै नखेलेको बताए ।

'हामीले दुई खेल खेल्यौं । यो खेल हामीले जित्नु पर्ने थियो । पहिलो सेट निकै राम्रो थियो तर दोस्रो सेटमा पनि सुरुवाती अग्रता लिएका थियौं तर सर्भिस, नेटिङ, ब्लाकिङमा चुक्नु पुग्दा खेल बिग्रियो,' प्रशिक्षक एबिङले भने, 'पहिलो र दोस्रो सेटको खेल हामीलाई अझै आवश्य थियो । तेस्रो सेट बिल्कुलै फरक खेल थियो । लाग्यो खेलाडीहरु कोर्टमा नै थिएनन् ।'

माल्दिभ्ससँगको हारसँगै समूह 'ए' बाट नेपाल जितविहीन बन्दै प्रतियोगिताबाट बाहिरिएको छ । नेपालले अंक जोड्न सकेन । अब नेपालले पाँचौ स्थानको लागि समूह 'बी' को तेस्रो हुने टोलीसँग खेल्नेछ ।

यस्तै प्रशिक्षक एबिङले माल्दिभ्सविरुद्धको खेलबाट खेलाडीहरुले पाठ सिक्नु पर्ने समेत बताए ।

'उनीहरुको सट राम्रो थियो । तर, त्यसलाई रोक्ने तरिका हुन्छ । हामी त्यसमा पनि चुकेका हौँ । हामीले यस बिषयमा सुधार गर्नु पर्छ । यदि २/३ वटा सट ब्लक भए उनीहरु पनि दबाबमा आउने थिए । यो निकै कडा शिक्षा हो,' प्रशिक्षक एबिङले थपे, 'आउने दिनमा यसलाई सुधार गर्नु जरुरी छ । घरेलु भूमिमा यति ठुलो समर्थकको माझ खेल खेल्न पाउनु निकै ठुलो कुरा हो । यसबाट हामीले पाठ लिनु पर्छ ।'

त्यस्तै प्रशिक्षक एबिङले उज्वेकिस्तान र किर्गीस्तानले फाइनल खेल्ने बताए । 'अहिलेसम्मको खेल हेर्दा मेरो बिचारमा उज्वेकिस्तान र किर्गिस्तानले फाइनल खेल्ने छन्,' एबिङले थपे ।