समूह विजेता बन्दै उज्वेकिस्तान सेमिफाइनलमा

काठमाडौं । उज्वेकिस्तानले एसियन भलिबल कन्फेडेरेसन (एभिसी) सेन्ट्रल जोन सिनियर पुरुष भलिबल प्रतियोगिताको सेमिफाइनलमा प्रवेश गरेको छ । 

बुधबार भएको खेलमा अफगानिस्तानलाई ३-० को सोझो सेटमा पराजित गर्दै उज्वेकिस्तानले लगातार तेस्रो जित निकाल्दै सेमिफाइनलमा स्थान बनाएको हो ।

लगनखेलस्थित त्रिभुवन आर्मी क्लबको शारीरिक तालिम तथा प्रशिक्षण केन्द्रको कभर्डहलमा उज्वेकिस्तानले अफगानिस्तानलाई २५-२३, २९-२७ र २९-२७ ले हराएर अन्तिम चारको यात्रा तय गर्यो ।

जितसँगै समूह 'बी' को उज्वेकिस्तानले ३ खेलबाट शतप्रतिशत जितसहित ६ अंक जोड्यो । र, उज्वेकिस्तान समूह विजेता बन्दै सेमिफाइनलमा पुगेको छ ।

पहिलो खेलमा उज्वेकिस्तानले बंगलादेश र दोस्रो खेलमा तुर्कमेनिस्तानलाई हराएको थियो ।

अफगानिस्तान भने प्रतियोगिताबाट बाहिरिएको छ । अफगानिस्तानले ३ खेलमा २ अंक जोड्यो ।

यस समूहबाट सेमिफाइनल पुग्ने अर्को टोलीको तय तुर्कमेनिस्तान र बंगलादेशबीचको खेलपछि हुनेछ ।