काठमाडौं । नेपाली राष्ट्रिय पुरुष भलिबल टिमका नियमित स्पाईकर मान बहादुर श्रेष्ठ अहिले टिममा छैनन् । उनको अनुपस्थितिमा नेपालले घरेलु मैदानमा एभिसी सेन्ट्रल जोन पुरुष भलिबल च्याम्पियनसिप खेलिरहेको छ ।
आठौं राष्ट्रिय खेलकुद उनले खेलेनन् । सोही कारण उनले एभिसी सेन्ट्रल जोन पुरुष भलिबल प्रतियोगितामा छनोट गरिएन । जापानमा व्यवसायीक भलिबल खेल्न उनले आठौं राष्ट्रिय खेलकुद छाडेका थिए ।
अहिले 'बिच' भलिबलमा रमाईरहेका मानबहादुरले आफ्नै घरेलु मैदानमा भएको प्रतियोगिता खेल्न पाएनन् । आठौं राष्ट्रिय खेलकुद नखेलेको कारण देखाउँदै उनलाई राष्ट्रिय टिमको बन्द प्रशिक्षणबाट बाहिर राखियो । तर, सागको बन्द प्रशिक्षणमा सहभागी हुन नपाउनुको दोष आफुलाई दिन तयार देखिएका मानबहादुर एभिसी सेन्ट्रल जोन खेल्न नपाएकोमा भने दुखी देखिए ।
कोर्टमा नदेखिएपनि उनी प्रतियोगिता हेर्न दिनहु जाने गर्छन् । दर्शकदिर्घामा बस्छन् । नेपालको खेल नियाल्छन् । खेलाडीलाई हौसला प्रदान गर्छन् । नेपालले सट हान्दा उफ्रन्छन्, अंक गुमाउँदा निराश बन्छन् ।
ललितपुरको लगनखेलस्थित आर्मीको कभर्डहलमा भेटिएका उनै मानबहादुरसँग खेलपाटीकर्मी गिता राईले कुराकानी गरेकी छिन् ।
किर्गिस्तानविरुद्ध नेपालको प्रर्दशन कस्तो लाग्यो ?
समग्रमा टिमको प्रर्दशन धेरै राम्रो रह्यो । तर, नेपालले १–२ सेट जित्छ भन्ने लागेको थियो । सन् २०१७ मा माल्दिभ्समा भएको खेलमा किर्गिस्तानविरुद्व खेल्दा नेपालले एक सेट जितेको थियो । घरेलु मैदानमा दर्शकको राम्रो साथ थियो । खेलाडीलाई ऊर्जा दिनुभएको थियो । त्यसकारण जित्छ भन्ने लागेको थियो ।
नेपाल पहिलो खेलमा कहाँ चुक्यो भन्ने लाग्छ ?
नेपालको ब्लक र डिफेन्स पोजिसन कमजोर देखियो । उनीहरु अग्ला थिए । किर्गिस्तानका कप्तानले ब्याकबाट लगभग ९० प्रतिशत बल सिधा लाईनमा हानेका थिए । १० प्रतिशतमात्र क्रस हानेको थियो । नेपाली प्रशिक्षकले सिधा रेखालाई बिशेष तरिकाले हेर भनेका थिए । क्रसबाट आउने लाईनलाई छाडिदेउ भनेका थिए । तर खेलाडी त्यसमा सफल हुन सकेनन् । सोही कारण ब्लक र डिफेन्स पोजिसन कमजोर भयो ।
तपाई मैदानमा देखिनुहुन्न, भलिबलका धेरै प्रशंसक तथा दर्शक तपाईका बारे सोध्छन् । कारण के हो ?
यसमा मेरो विगतको कुरा जोडिन्छ । राखेपले २०७५ साल चैत भित्र आठौं राष्ट्रिय खेलकुद सक्ने बताएको थियो । तर आठौंको मिति तय हुनु भन्दा ६ महिना अघिनै जापानको एक क्लबबाट खेल्ने सम्झौता गरेको थिए । चैतभित्र राष्ट्रिय खेलकुद सकेर बैशाखमा खेल्न सकिन्छ होला भन्ने लागेको थियो । तर फेरी राष्ट्रिय खेलकुद बैशाखमा हुने तय भयो । जापानमा समेत ४ गते खेल तय थियो, नेपालमा समेत भलिबल ४ गतेनै सुरु हुने भयो । पहिलो खेल छुटेपनि ६ गते नेपाल आएर बाँकी खेल खेल्छु भनेर अफिससँग सल्लाह समेत गरे । तर अफिस र प्रशिक्षकले अस्विकार गर्नुभयो ।
नेपाल आएर बाँकी खेल खेल्न अनुरोध समेत गरेको थिए । तर, खेल्न पाईन । सोही कारण राष्ट्रिय खेलकुदको कारण देखाउँदै मलाई टिम बाहिर राखिएको छ ।
टिममा आफ्नो महशुश कत्तिको गर्नुहुन्छ ?
टिममा निरन्तर ४ वर्ष एउटै परिवारजस्तो भएर खेलियो । राष्ट्रिय टिमबाट एउटा मेडल दिलाउन पनि सफल भयौ । घाइते भएर बाहिर बसेको भए, केही लाग्दैन थियो होला । तर खेल्न सक्ने हुदाँ हुदै समेत टिममा नपर्दा दुख लागेको छ । तर गल्ती आफ्नै हो । छनोटको आधार राष्ट्रिय खेलकुद खेलिन् । तर भलिबल संघले आठौंलाई सागको छनोट भनेको थियो । तर एभिसी सेन्ट्रल जोन खेल्न पाउनुपर्ने जस्तो लाग्छ । बाहिर हुदाँ बेग्लै उर्जा आएको छ । घरेलु मैदानमा खेल्न पाएको भए बेग्लै महशुश गर्थे होला ।
नेपालको सेमिफाइनलको आश कत्तिको देख्नुभएको छ ?
यसअघि समेत हामीले माल्दिभ्सविरुद्व खेलेका थियौ । हामीले दुवै खेल जितेको थियौ । घरेलु मैदानको समर्थन छ । तर हामीले निकै प्रतिस्पर्धात्मक रुपमा खेल जितेका थियौ । दुवैलाई खेल जित्न सजिलो छैन ।
माल्दिभ्सको टिम कत्तिको बलियो छ अहिले ?
माल्दिभ्स अहिले धेरै बलियो छ । यसअघि विदेशी प्रशिक्षक ल्याएर निरन्तर प्रशिक्षण गरेका थियौ । सबै खेल अन्तिम सेटमै जितेका थियौ ।
नेपाली टिमको कमजोरी अझै पनि रिसिभ र डिफेन्समा देखिन्छ । टिममा कत्तिको सुधार पाउनुहुन्छ ?
पहिले भन्दा अहिले सुधार आएको छ । अफगानिस्तानसँगको मैत्रीपूर्ण खेलको पहिलो सेटमा ६–७ वटा सर्भिस बिग्रिएको थियो । दिनप्रति दिन खेलमा सुधार आएको छ । तर अझै धेरै सुधार गर्न बाँकी छ । पहिलो प्रतिद्वन्दी हामीले भेट्न सक्ने स्तरको थियो, तर सकेनौ । हाम्रो अझै रिसिभ र डिफेन्समा कमजोरी छ ।
नेपाललाई टक्कर दिने प्रतिद्वन्दी को देख्नुहुन्छ ?
उज्वेकिस्तान र किर्गिस्तान टिम नेपाल भन्दा माथिल्लो स्तरका छन् । बाँकी सबै उस्तै हुन् ।
प्रधानसेनापति कपमा सुरुमा आर्मीले तपाईलाई खेलाएन । पछि हार्ने अवस्थामा टिममा बोलायो । कारण के थियो ?
मलाई विभागीय कारबाही भयो । जापानमा खेलेर आएपछि दुई खेल खेल्न पाईन । दुई प्रतियोगिताको फाईनलमा पुगेर आर्मीले हार्न पुगेको थियो । अनि प्रधानसेनापति कपको तेस्रो खेलमा मलाई उतारियो । सुरुवाती दुवै खेल हारेर केही हुन्छ कि भनेर मलाई ल्याएको हुनुपर्छ वा विभागीय कारबाही सकेर मैदान उतारेको हुनुपर्छ ।
अब राष्ट्रिय टिममा तपाईलाई कहिले देख्न पाउँछौ ?
सायद यो वर्ष देखिन्न होला जस्तो छ । अब अर्को वर्ष देखिन्छ । यो वर्ष बिच भलिबल खेल्न गईरहेको छु । बिच भलिबलको अनुभव त छैन । इन्डोरको अनुभवलाई बिच भलिबललाई प्रयोग गर्छु ।
