उज्वेकिस्तान सेमिफाइनल नजिक

काठमाडौं । उज्वेकिस्तानले एसियन भलिबल कन्फेडेरेसन (एभिसी) सेन्ट्रल जोन सिनियर पुरुष भलिबल प्रतियोगितामा लगातार दोस्रो जित निकालेको छ । 

लगनखेलस्थित त्रिभुवन आर्मी क्लबको शारीरिक तालिम तथा प्रशिक्षण केन्द्रको कभर्डहलमा मंगलबार तुर्कमेनिस्तानलाई ३-० को सोझो सेटमा पराजित गर्दै उज्वेकिस्तानले लगातार दोस्रो जित निकालेको हो ।

दोस्रो जित निकाल्ने क्रममा उज्वेकिस्तानले तुर्कमेनिस्तानलाई २५-१८, २५-२१ र २५-१५ को सेटमा पराजित गर्यो ।

जितसँगै समूह 'बी' को उज्वेकिस्तानले २ खेलबाट ४ अंक जोडेको छ । र, उज्वेकिस्तान सेमिफाइनल नजिक पुगेको छ ।

पहिलो खेलमा उज्वेकिस्तानले बंगलादेशलाई ३-० कै सेटमा हराएको थियो । 

तुर्कमेनिस्तानको भने यो पहिलो हार हो । तुर्कमेनिस्तानले पहिलो खेलमा अफगानिस्तानलाई हराएको थियो ।