काठमाडौं । तुर्कमेनिस्तानले एसियन भलिबल कन्फेडेरेसन (एभिसी) सेन्ट्रल जोन सिनियर पुरुष भलिबल प्रतियोगितामा विजयी सुरुवात गरेको छ ।
सोमबार भएको खेलमा अफगानिस्तानलाई ३-१ को सेटमा पराजित गर्दै तुर्कमेनिस्तानले विजयी सुरुवात गरेको हो ।
लगनखेलस्थित त्रिभुवन आर्मी क्लबको शारीरिक तालिम तथा प्रशिक्षण केन्द्रको कभर्डहलमा तुर्कमेनिस्तानले अफगानिस्तानलाई ३२-३०, १६- २५, २७-२५ र २६-२४ को सेटमा पराजित गर्यो ।
जितसँगै समूह 'बी' को तुर्कमेनिस्तानले २ अंक जोडेको छ । अफगानिस्तानले भने हारबाट प्रतियोगिताको सुरुवात गरेको छ ।
अब तुर्कमेनिस्तानले दोस्रो खेलमा मंगलबार उज्वेकिस्तान र अफगानिस्तानले बंगलादेशको सामना गर्नेछ ।
प्रतियोगिता अन्तर्गत नै यसै समूहमा आज बेलुका बंगलादेशले उज्वेकिस्तानको सामना गर्नेछ ।
यस्तै नेपालले आज दिउँसो किर्गिस्तानसँग खेल्नेछ ।
