एभिसी सेन्ट्रल जोन भलिबलको तयारी पुरा

काठमाडौं । नेपालमा आयोजना हुने एसियन भलिबल कन्फेडेरेसन (एभिसी) सेन्ट्रल जोन सिनियर पुरुष भलिबल प्रतियोगिताको सम्पूर्ण तयारी पुरा भएको छ ।

नेपाल भलिबल संघले मंगलबार पत्रकार सम्मेलन गर्दै प्रतियोगिताको सम्पूर्ण तयारी पुरा भएको जनाएको छ । संघले विदेशी टिमलाई मध्य नजर गर्दै त्रिभुवन विमानस्थलमै हेल्प डेक्स स्थापना गरिएको जनाएको छ ।

संघका महासचिव जितेन्द्र बहादुर चन्दले प्रतियोगिताको तयारी सकिएको जानकारी दिदै अफगानिस्तान नेपाल आईसकेको र अन्य टिम केहि दिन भित्र नेपाल आइपुग्ने जानकारी गराए ।

यस्तै संघले प्रतियोगिता हेर्न आउने दर्शकलाई टिकटको शुल्क नलाग्ने जानकारी गराएको छ । तर, संघले आवश्यकता अनुसार मात्र समर्थकलाई भित्र पस्न दिने जनाएको छ ।

लगनखेलस्थित सैनिक शारीरिक तालिम तथा खेलकुद केन्द्रमा हुने प्रतियोगिता भदौ २ देखि भदौ ७ गतेसम्म संचालन हुनेछ ।

एसियन भलिबल संघको संयोजनमा हुने प्रतियोगितामा नेपालसहित बंगलादेश, माल्दिभ्स, अफगानिस्तान, किर्गिस्तान, तुर्किमिनिस्तान र उज्वेकिस्तानसहित ७ टोलीले प्रतिस्पर्धा गर्नेछन् ।

प्रतियोगिताको खेल तालिका भने टेक्निकल टिमको बैठकपछि केहि दिनमा सार्वजनिक गरिने संघले जनाएको छ।

प्रतियोगिताको लागि मुख्य प्रशिक्षक हान एबिङले १४ सदस्सीय नेपाली टोलीको घोषणा गरिसकेका छन् । यस्तै नेपालले प्रतियोगिताको लागि अफगानिस्तानसँग साउन ३० र ३१ मैत्रीपूर्ण खेल खेल्ने छ ।

नेपाली टिम :

ईम बहादुर राना मगर (कप्तान)

कुलबहादुर थापा (उपकप्तान)

दिपक राज जोशी

धनबहादुर भट्ट

विशाल विक

राजेन्द्र विष्ट

टेकराज अवस्थी

हरिबहादुर अधिकारी

दुर्गा बहादुर खड्का

नरेन्द्र गिरी

ईश्वर थापा मगर