यस वर्ष बीच भलिबलमै रमाउँछु - मान बहादुर

काठमाडौं । नेपालको राष्ट्रिय खेल भलिबलले पाएको उत्कृष्ट खेलाडीमा ओपन स्पाइकर मान बहादुर श्रेष्ठ पनि एक हुन् ।

तर, घरेलु मैदानमा आयोजना हुने पाँचौ संस्करणको एसियन भलिबल कन्फेडेरेसन (एभिसी) सेन्ट्रल जोन सिनियर पुरुष भलिबल प्रतियोगितामा राष्ट्रिय टोलीका नियमित सदस्य मान बहादुर देखिने छैनन् । एभिसी सेन्ट्रल जोन भदौ २ देखि ८ गतेसम्म संचालन हुदैछ ।

प्रदेश नम्बर ५ मा आयोजना भएको आठौं राष्ट्रिय खेलकुद नखेलेको कारण त्रिभुवन आर्मी क्लबका कप्तान समत रहेका मान बहादुर नेपाली टोलीको प्रारम्भिक चरणको टिममै परेका थिएनन् । विभागीय टिम आर्मीको विभागीय कारबाहीमा परेपछि मान बहादुरले आठौं गुमाएका थिए ।

लगनखेलस्थित सैनिक शारीरिक तालिम तथा खेलकुद केन्द्रको कभर्डहलमा हुने सेन्ट्रल जोनमा अब मान बहादुरले दर्शकको रुपमा खेल हेर्ने छन् ।

सेन्ट्रल जोनमा लागि नेपालको मुख्य प्रशिक्षक हान एबिङले १४ सदस्यीय टिमको घोषणा गरिसकेका छन् । जसमा मान बहादुर छैनन् ।

सेन्ट्रल जोनको टिममा नपरेपनि मान बहादुर भलिबलबाट टाढा भने रहेका छैनन् । पछिल्लो समय मान बहादुर 'बीच भलिबल' मा रमाईरहेका छन् । यस वर्ष मान बहादुर 'बीच भलिबल' मै रमाउने छन् ।

‘यस वर्ष बीच भलिबलमा बिताउँछु । सेन्ट्रल जोन र साग दुवै नहुने भयो । त्यसैले बीच भलिबल रोजे,' खेलपाटीसँग कुरा गर्दै मान बहादुरले भने, ‘पहिलो पटक खेलेको हुँ, राम्रो अनुभव रह्यो । राष्ट्रिय गेम खेल्दा प्रथम भएपछि यस वर्ष यसै लाईनै रोजेको छु ।’ 

पोखरामा सम्पन्न राष्ट्रिय बीच भलिबलबाट मान बहादुर बीच भलिबलको क्याम्पमा परेका छन् । उक्त प्रतियोगिताको पुरुषतर्फ मान बहादुर र दिल बहादुर सुनारको जोडीले उपाधि जितेका थिए ।

नेपाली टोलीको उपकप्तान समेत रहिसकेका मान बहादुरले यस वर्ष नेपालमा आयोजना १३ औं दक्षिण एसियाली खेलकुद (साग) मा पनि बीच भलिबल खेल्नेछन् ।

‘नेपालमै हुन लागेको साग गेम पनि बीच भलिबलबाट खेल्नेछु । त्यसैबाट भएपनि देशको प्रतिनिधित्व गर्छु ।’ मान बहादुरले भने । १३ औं साग मङ्सिर १५ बाट २४ गतेसम्म हुने तालिका रहेको छ ।

मान बहादुरले नेपालबाट पहिलो पटक बीच भलिबल खेल्न लागेका हुन् । तर, उनलाई पहिलो सहभागीतामै देशलाई पदक दिलाउन योजना छ ।

‘पहिलो पटक देशको प्रतिनिधित्व गर्दै बीच भलिबल खेल्ने निर्णय लिएको छु । मेडलको आशा छ ।’ मान बहादुर भन्छन् ।

विभागीय टिमको कारबाही फुकुवा भएपछि मान बहादुरले चौथो संस्करणको प्रधानसेनापति राष्ट्रिय पुरुष भलिबल प्रतियोगिता खेलेका थिए । उक्त प्रतियोगिताको उपाधि आर्मीले जितेको थियो ।

त्यसअघि मान बहादुर बिनाको दुई प्रतियोगितामा भने आर्मीले उपविजेता चित्त बुझाएको थियो । मान बहादुर बिनाको आर्मीले आठौं राष्ट्रिय खेलकुद र पाथिभरा पुरुष भलिबलमा आर्मी फाइनलमा नेपाल पुलिसको हातबाट पराजित भएको थियो ।

यस वर्ष बीच भलिबलमा बिताएपनि अर्को वर्षबाट भने मान बहादुर भलिबलमै फर्कने छन् ।

‘भलिबललाई एकदमै मिस गरिरहेको छु । खेल्न नपाए पनि बाहिर बसेर टिमको समर्थक गर्छु । सधै खेलिरहने मान्छे बाहिर बसेर हेर्दा कस्तो हुन्छ । यस पटक हेरौं,' १० वर्षको लामो भलिबल अनुभव बोकेका मान बहादुरले भने ।