राष्ट्रिय पुरुष भलिबल टोलीमा तीन नयाँ अनुहार

काठमाडौं । एसियन भलिबल कन्फेडेरेसन (एभिसी) सेन्ट्रल जोन सिनियर पुरुष भलिबल प्रतियोगिताका लागि नेपालले राष्ट्रिय टिमको टुंगो लगाएको छ ।

नेपालमा भदौमा आयोजना हुने प्रतियोगिताका लागि नेपालले बन्द प्रशिक्षणमा रहेका १८ सदस्सीय खेलाडीबाट १४ सदस्सीय टिमको टुंगो लगाएको हो ।

नेपाल भलिबल संघले टिमको औपचारिक घोषणा भने आइतबार गर्ने जनाएको छ । तर, मुख्य प्रशिक्षक नेदरल्याण्ड्सका हान एबिङले बिहिबार प्रतियोगिता खेल्ने अन्तिम टोलीको तय गर्दै बाहिरिने खेलाडीलाई जानकारी गराएको छ ।

'प्रशिक्षक एबिङले आजबाट १४ खेलाडी छनोट गरेका छन् । टिममा पर्ने र बाहिरिने खेलाडीबारे प्रशिक्षक एबिङले सबैलाई जानकारी गराउनु भएको छ,' एक खेलाडीले खेलपाटीसँग भने ।

एबिङले घोषणा गरेको टिममा ३ नयाँ खेलाडीले राष्ट्रिय टिममा स्थान बनाएका छन् । नेपाली टिममा पहिलो पटक स्थान बनाउने खेलाडीमा त्रिभुवन आर्मी क्लबका ओपन स्पाइकर राजेन्द्र बिष्ट, आर्मीका क्विकर दुर्गा बहादुर खड्का र एपीएफका ओपन स्पाइकर टेकराज अवस्थी रहेका छन् ।

यस्तै टिमबाट बाहिरिनेमा राजु शेरचन, दुर्गा महतो, द्वारिका थापा र सारान समरी रहेका छन् ।

प्रशिक्षक एबिङले घोषणा गरेको टिममा आर्मीबाट सर्वाधिक ७, पुलिसबाट ४ र एपीएफबाट ३ खेलाडी परेका छन् । सेन्ट्रल जोनका लागि एबिङले ४ ओपन स्पाइकर, ३ आउट साइड, ३ अपोजिट ब्याक, २ लिब्रो र २ लिफ्टरलाई टिममा समावेश गरेका छन् ।

घरेलु भूमिमा हुने प्रतियोगितामा नियमित सदस्य मान बहादुर श्रेष्ठ हुने छैनन् । विभागीय टिम आर्मीको कारबाहीमा परेपछि आठौं राष्ट्रिय खेलकुद नखेलेको कारण मान प्रारम्भिक टोलीमै परेका थिएनन् ।

एसियन भलिबल संघको संयोजनमा आयोजना हुने सेन्ट्रल जोनमा नेपालसहित बंगलादेश, माल्दिभ्स, अफगानिस्तान, किर्गिस्तान, तुर्किमिनिस्तान र उज्वेकिस्तानसहित ७ टोलीले प्रतिस्पर्धा गर्नेछन् ।

प्रतियोगिता भदौ २ देखि भदौ ७ गतेसम्म संचालन हुनेछ ।

नेपाली टिम :

ईम बहादुर राना मगर (कप्तान)

कुलबहादुर थापा (उपकप्तान)

दिपक राज जोशी

धनबहादुर भट्ट

विशाल विक

राजेन्द्र विष्ट

टेकराज अवस्थी

हरिबहादुर अधिकारी

दुर्गा बहादुर खड्का

नरेन्द्र गिरी