खेल सामग्रीको अवस्था बुझ्न तिम्सिना र गुरुङ भारततर्फ

काठमाडौं । राष्ट्रिय खेलकुद परिषद्का उपाध्यक्ष पिताम्वर तिम्सिना र नेपाल ओलम्पिक कमिटिका सदस्य तेज गुरुङ भारत प्रस्थान गरेका छन् ।

नेपालमा आयोजना हुने १३ औं दक्षिण एसियाली खेलकुद (साग) का लागि निर्माणाधीन भौतिक पूर्वाधारहरुको गुणस्तर बुझ्न र निरक्षण गर्न तिम्सिना र गुरुङ सोमबार दिल्ली प्रस्थान गरेका हुन् ।

'हामी सागको तयारीको चटारोमा छौँ । निर्माण ब्यावसायी कम्पनीहरुले बोलपत्रबाट सम्झौता गरेर भिआईपी प्याराफिटको काम गर्दै छन्,' दिल्ली प्रस्थान गर्नुअघि उपाध्यक्ष तिम्सिनाले भने, 'हामी बन्दै गरेको सामाग्रीको गुणस्तर, तोकिएको सामाग्रीको अवस्था र निरक्षणलगायतका विषयमा बुझ्न हामी जान लागेका हौं ।’

सामाग्रीको अवस्था बुझ्न दिल्लीलगायत बैंगलोर र लखनउ पनि जाने कार्यक्रम रहेको जानकारी गराउदै उपाध्यक्ष तिम्सिनाले काम सम्पन्न भएका सामाग्रीको तत्काल डेलिभरीका सम्बन्धमा पनि कुरा गर्ने बताए ।

यस्तै सदस्य गुरुङले ओलम्पिकले बिग्रिएको सम्वन्धलाई खेलको माध्यमबाट समुधुर बनाउने बताए । उनले नेपाल साग गर्न तयार रहेको सन्देश दिने समेत बताए ।

'भारतको खेल पदाधिकारी, भारतीय ओलम्पिक कमिटिलाई हामी तयारीमा छौं भन्ने सन्देश दिने छौं,' गुरुङले भने ।

नेपाल ह्यान्डबल संघका अध्यक्ष समेत रहेका गुरुङले नेपाली ह्यान्डबल खेलाडीलाई भारतमा सागको प्रशिक्षणको व्यवस्थाका लागि समेत कुराकानी अगाडि बढाउने बताए ।