काठमाडौं । सामाखुशी इङलिस बोर्डिङ स्कुल (सेब) को मुख्य प्रायोजन तथा ढोरपाटन क्लबको आयोजनामा पाँचौं सेब टु ए साइड पुरुष भलिबल प्रतियोगिता बिहीबारदेखि हुने भएको छ ।
प्रतियोगितामा १ सय १७ टिमको सहभागिता रहने सेबका संस्थापक प्रिन्सिपल युवराज थापाले जानकारी गराए । सह प्रयोजकमा मास्टर फेन्सिङका महेन्द्र छन्त्याल रहेका छन् ।
प्रतियोगिताको विजेताले १ लाख, उपविजेताले ५० हजार, तेश्रोले २५ हजार र चौथोले १० हजार नगद पुरस्कार प्राप्त गर्ने आयोजक क्लबका अध्यक्ष मनवीर छन्त्यालले जानकारी दिए ।
गत संस्करण भन्दा पुरस्कार राशीमा दोब्बर भन्दा बढीले बृद्धि गरिएको हो । गत संस्करणमा शीर्ष चार स्थान हात पार्नेले क्रमशः ४० हजार, २० हजार, १० हजार र ५ हजार नगद पुरस्कार पाएका थिए ।
प्रतियोगिता सञ्चालन गर्न करिब ४ लाख ५० हजार खर्च हुने सेबकी संस्थापक निर्देशक मधुमाया थापाले जानकारी दिइन् ।
तीनदिने प्रतियोगिताका खेलहरु नयाँ बसपार्कमा हुनेछ । गत संस्करणको उपाधि आर्मीका दिल सुनार र प्रकाश थापाको जोडीले जितेका थिए ।
