एभिसी सेन्ट्रल जोन भलिबल आर्मीको कभर्ड हलमा हुने

काठमाडौं । नेपालमा आयोजना हुने पाँचौं संस्करणको एसियन भलिबल कन्फेडेरेसन (एभिसी) सेन्ट्रल जोन सिनियर पुरुष भलिबल प्रतियोगिता लगनखेलस्थित नेपाल आर्मीको कभर्ड हलमा हुने भएको छ ।

नेपाल भलिबल संघले शनिबार आयोजना गरेको पत्रकार सम्मेलनमा प्रतियोगिताको खेलहरु आर्मीको सैनिक शारीरिक तालिम तथा खेलकुद केन्द्रमा हुने जानकारी गराएको छ । यसअघि संघले प्रतियोगिताको मिति तय गरेपनि आयोजना स्थल टुंगो लगाएको थिएन् ।

संघका महासचिब जितेन्द्र बहादुर चन्दले प्रतियोगिता आर्मीको कभर्ड हलमा हुने पक्का भएको बताए । यस्तै महासचिब चन्दले उक्त कभर्ड हलमा लाइटको समस्या रहेको र त्यसका लागि संघले करिब साढे ३ लाख खर्च गरेर लाइट राख्ने बताए ।

एसियन भलिबल संघको संयोजनमा आयोजना हुने प्रतियोगिता साउन ३२ देखि भदौ ८ गतेसम्म संचालन हुनेछ ।